पाल्पा । गोरखाको मनकामना दर्शनका लागि  पाल्पाको रम्भा गाउँपालिका – १, हुँगीबाट छुटेको बस नवलपरासी पूर्वको बुलिङटारमा दुर्घटना हुँदा ५ जनाको मृत्यु र २४ जना घाइते भएको छ ।

ना ६ ख ७५८० नम्बरको बस अनियन्त्रित भई सडकबाट झन्डै सय मिटर तल खसेर भएको दुर्घटनामा रम्भा गाउँपालिका–१ हुँगीका ४१ वर्षीय तारा विक, १७ वर्षीय विनय विक, ६२ वर्षीय धनी विक, ५८ वर्षीय देवी गाहा, स्याङ्जाको गल्याङ नगरपालिका–९ की ४५ वर्षीय फुलमाया विक रहेको प्रहरीले जनाएको छ ।

सोमबार बिहान ३ बजेको समयमा कालीगण्डकी करिडोरअन्तर्गत सडकमा बस दुर्घटनामा परेको हो । हुँगीबाट राति ९ बजे मनकामना दर्शनका लागि हिँडेका थिए ।दुर्घटनाग्रस्त बस भीरमा अड्किएको छ ।

घटनाको विस्तृत विवरण आउन बाँकी छ । घाइतेको स्थानीय र प्रहरीले उद्धार गरी उपचारका लागि विभिन्न अस्पतालमा लगिएको छ ।