एजेन्सी । नेदरल्यान्ड्समाथि नाटकीय जित निकाल्दै अर्जेन्टिना फिफा विश्वकप कतार २०२२ को सेमिफाइनलमा प्रवेश गरेको छ । पेनाल्टी सुटआउटमा ४–३ को जितका साथ दक्षिण अमेरिकी च्याम्पियन अर्जेन्टिना अन्तिम चारमा पुगेको हो ।

निर्धारित ९० मिनेटको खेल २–२ गोलको बराबरी तथा त्यसपछि अतिरिक्त समयमा पनि गोल निस्कन नसकेपछि खेल पेनाल्टी सुटआउटमा लम्बिएको थियो । एक समय अर्जेन्टिना २–० को आरामदायी अग्रतामा रहेपनि नेदरल्यान्ड्सले नाटकीय पुनरागमन गर्दा खेल खेल रोमाञ्चक मोडमा पुगेको थियो ।

अर्जेन्टिनका कप्तान लियोनेल मेस्सी, लिआन्द्रो पारेडेस, गोन्जालो मोन्टिएल र लौटारो मार्टिनेजले गोल गर्दा एन्जो फर्नान्डेजले गोल गर्न सकेनन् । नेदरल्यान्ड्सका तिउन कुपमेनर्स, वुट वेघर्स्ट र लुक डे जोङले गोल गर्दा भर्जील भान डाइक र स्टिभन बर्घिअसले पनि गोल गर्न सकेनन् ।

त्यसअघि मोलिनाले ३५ औं मिनेटमा गोल गर्दै अर्जेन्टिनालाई अग्रता दिलाए । ७३ औं मिनेटमा अर्जेन्टिनाले अग्रता दोब्बर पार्यो । पेनाल्टी क्षेत्रभित्र डेन्जेल डम्फ्राइजले मार्कस अकुनालाई लडाएपछि रेफ्रीले पेनाल्टी दिदा मेस्सी चुकेनन् ।

८३औं मिनेटमा वुट वेघर्स्टले गोल फर्काउँदै खेलमा फर्कने संकेत दियो । त्यसपछि इन्ज्युरी समयमा नेदरल्यान्ड्सले बराबरी गोल फर्कायो । फ्रिकिकमा बर्घिअसले दिएको चलाखीपूर्ण पासलाई वेघर्स्टले गोलमा परिणत गरे ।