एजेन्सी ।  साविक विजेता फ्रान्स फिफा विश्वकप कतार २०२२ को सेमिफाइनलमा प्रवेश गरेको छ । अल बेयत रंगशालामा शनिबार  इंग्ल्यान्डलाई २-१ ले हराउँदै फ्रान्सले अन्तिम चारमा स्थान पक्का गरेकाे हाे ।

फ्रान्सकाे अन्तिम चारकाे यात्रामा औरेलिएन चुआमेनी र ओलिभर जिरुडले गाेल गरे ।  इंग्ल्यान्डका कप्तान ह्यारी केनले एक गाेल फर्काए । खेलको १७औं मिनेटमा चुआमेनीको गोलमा फ्रान्सले अग्रता लियो ।

५४औं मिनेटमा ह्यारी केनले पेनाल्टीमा गोल गर्दै खेललाई १–१ गाेलकाे बराबरीमा ल्याए । पेनाल्टी क्षेत्रभित्र चुआमेनीले बुकायो साकालाई लडाएपछि रेफ्रीले पेनाल्टी दिएका थिए ।

७८औं मिनेटमा ओलिभर जिरुडले हेडरमार्फत गोल गर्दै फ्रान्सलाई २–१ काे अग्रता दिलाए । ८४औं मिनेटमा इंग्ल्यान्डले पेनाल्टीमार्फत बराबरीकाे अवसर पाएपनि कप्तान केन चुक्दा टाेली बाहिरिन पुग्याे ।

अब  फ्रान्सले सेमिफाइनलमा मोरक्कोको सामना गर्नेछ । मोरक्कोले आजै भएको तेस्रो क्वाटरफाइनलमा पोर्चुगललाई १-० ले पराजित गरेको थियो । प्रतियोगिताको अर्को सेमिफाइनलमा क्रोएसिया र अर्जेन्टिना भिड्नेछन् ।