सिड्नी, १० फागुन । अस्ट्रेलियाको सिड्नीमा गत वर्ष कार्यस्थलमा बृद्ध कुटेको आरोपमा पक्राउ परेर ८ महिना जेल परेका एक नेपाली युवा पुनरावेदनबाट रिहा भएका छन् ।

जेलभित्र सजाय भोगिरहेका प्रकाश पौडेललाई यहाँको न्यूसाउथवेल्स राज्यको अदालतले रिहा गर्न आदेश दिएको हो ।

बुपा एज केयरमा एक ८२ वर्षीय बृद्धमाथि हातपात गरेको आरोपमा पौडेल गत जनवरी २३ तारिख गरिएको अदालती फैसलाका आधारमा जेल चलान भएका थिए ।

पौडेलका वकिलहरुले उनी घटना हुनुअघि निकै डराएको अवस्थामा रहेको बताएका थिए ।

सिड्नी डिष्ट्रिक कोर्टका जज हेलेन सेम्सले पौडेलले जुन घटना गराए त्यसमा ठूलो पश्चातापमा रहेको पाएको बताएका थिए । पौडेलका वकिलहरुले घटनालाई अतिरञ्जित बनाउँदै प्रचार गरिएको आरोप लगाएका छन् ।

प्रकाशलाई अदालतले रिहा गर्न आदेश दिएपनि अनिवार्य रुपमा सात महिनासम्म विभिन्न सामाजिक कार्य भने गर्नुपर्नेछ । त्यसपछि मात्रै आफ्नो व्यक्तिगत जीवन ज्यून पाउने छन् ।