मस्को । विश्व खेलकुदको कुम्भ मेला फिफा विश्वकप सुरु हुन अब ५ दिनमात्र बाँकी छ ।

विश्वकप सुरु हुनुअघि सम्पूर्ण टोलीले विश्वकपका लागि अन्तिम २३ खेलाडीको नामावली पनि सार्वजनिक गर्दै अभ्यास र मैत्रीपूर्ण खेलहरुमा व्यस्त रहेका छन् । विश्वकपमा सहभागी ३२ टोलीलाई आठ समूहमा विभाजन गरिएको छ ।

हरेक समूहका शीर्ष दुई टोली प्रि–क्वार्टर फाइनलमा प्रवेश गर्नेछन् । सहभागी सबै ३२ टोली विश्वकपको ट्रफी उचाल्ने अभियानमा रहनेछ । तर, एक टोलीले मात्र विश्वकपको उपाधि उचाल्नेछ । यसवर्ष साविकको विजेता जर्मनीसँगै ब्राजिल, अर्जेन्टिना र स्पेनलाई मुख्य दावेदार मानिएको छ ।

फुटबलमा जर्सी नम्वर ५ लाई डिफेन्सको जर्सीको रुपमा लिइन्छ । यो जर्सी लगाएर खेल्ने खेलाडीहरु विपक्षीको प्रहारलाई रोक्दै सहकर्मीलाई बल पास गर्ने गर्दछन् । ब्राजिलका क्यासमिरो, जर्मनीका म्याट हमेल्स, स्पेनका सर्जियो बुस्केट्स र अर्जेन्टिनाका लुकास बिजिला यही जर्सी लगाएर मैदान उत्रनेछ ।
१४ जुनबाट सुरु हुने प्रतियोगितामा कुल ६४ खेल खेलिनेछ । प्रतियोगिता रुसको ११ शहरको १२ रंगशालामा हुनेछ ।