मस्को । विश्व फुटबलको कुम्भ मेला फिफा विश्वकप सुरु हुन अब १ दिनमात्र बाँकी छ । विश्वकप सुरु हुनुअघि सम्पूर्ण टोलीले विश्वकपका लागि अन्तिम २३ खेलाडीको नामावली पनि सार्वजनिक गर्दै अभ्यास र मैत्रीपूर्ण खेलहरुमा व्यस्त रहेका छन् । विश्वकप अघिको अभ्यास खेलहरु सकिदा टिमहरु अन्तिम तयारीमा व्यस्त छन् ।

२१ औं संस्करणको विश्वकप भोलिदेखि शुरु हुदैछ । उद्घाटन खेलमा आयोजक रसियाले साउदी अरबको सामना गर्नेछ । खेल नेपालीसमय अनुसार राति ८ः४५ बजेपछि शुरु हुनेछ ।

दावेदार सबै टोलीमा गोलरक्षकको भूमिका महत्वपूर्ण भुमिका हुने गर्दछ । स्पेनका गोलरक्षक डेबिड डे हेया पछिल्ला केहि सिजनदेखि उत्कृष्ट लयमा छन् । छनोट र क्लब सिजनमा उत्कृष्ट खेल पस्केका डेभिडबाट स्पेनी टोलीले धेरै आशाा गरेको छ ।
फ्रान्सका गोलरक्षक ह्युगो लोरिस पनि क्लब फुटबलमा राम्रो सिजन बिताएर आएका छन् । फ्रान्सेली टोलीका कप्तान समेत रहेका लोरिसका लागि यो राष्ट्रिय टोलीबाट अन्तिम प्रतियोगिता हुन सक्छ ।

जर्मनीका म्यानुएल नोएर यो सिजन चोटले बेञ्चमा थन्किनु परेपनि चोटबाट पुनरागमन गर्दै आफ्नो लय समाउने लक्ष्यमा छ । अब पुरानै लयलाई समातेर टोलीको नेतृत्व गर्नु उनलाई चुनौती हुनेछ ।

विश्वकपमा सहभागी ३२ टोलीलाई आठ समूहमा विभाजन गरिएको छ । हरेक समूहका शीर्ष दुई टोली प्रि–क्वार्टर फाइनलमा प्रवेश गर्नेछन् । सहभागी सबै ३२ टोली विश्वकपको ट्रफी उचाल्ने अभियानमा रहनेछ । तर, एक टोलीले मात्र विश्वकपको उपाधि उचाल्नेछ । यसवर्ष साविकको विजेता जर्मनीसँगै ब्राजिल, अर्जेन्टिना, फ्रान्स र स्पेनलाई मुख्य दावेदार मानिएको छ ।