मस्को (एजेन्सी) – आयोजक रसिया फिफा विश्वकप फुटबल प्रतियोगिताको क्वार्टरफाइनलमा प्रवेश गरेको छ ।
रसियाले पेनाल्टी सुटआउटमा स्पेनलाई ४–३ ले पराजित गर्दै विश्वकपको अन्तिम आठमा पुग्न सफल भएको हो । नियमित ९० मिनेटमा स्पेन र रुसले १–१ को बराबरी खेलेपछि खेल अतिरिक्त समयमा धकेलिएको थियो । अतिरिक्त समयमा पनि गोल नभएपछि खेलको निर्णय पेनाल्टी सुटआउटबाट लिइएको हो । जसमा घरेलु टोलीले बाजी मार्न सफल भयो ।
पेनाल्टी सुटआउटमा रसियाका फेडर स्मोलोभ, सर्जि इग्नासेभिच, एलेकसन्डर गोलोभिन र डेनिस चेरेसेभले गोल गरे ।
स्पेनका लागि आन्द्रेस इनिष्टा, जेरार्ड पिके र सर्जियो रामोसले मात्र गोल गर्न सफल भए । कोकी र इगो आसपासको प्रहार रसियाका गोलरक्षक इगन अकिनफेभले बचाए ।
त्यसअघि मार्को एसेन्सियोको फ्रिकिकमा रुसका सेर्जे इग्नासेभिचले आत्मघाती गोल गरेपछि खेलमा स्पेनले अग्रता लिएको थियो । तर, खेलको ४० औं मिनेटमा जेरार्ड पिकेको ह्यान्डबलमा रुसले पेनाल्टी जित्न सफल भएको हो । सो पेनाल्टीमा स्ट्राइकर आर्टिम जुबा चुकेनन् र आयोजकलाई खेलमा फर्काएका हुन् ।
स्पेन समूह ‘बी’ को विजेता र रुस समूह ‘ए’को उपविजेताका रुपमा अन्तिम १६ प्रवेश गरेका हुन् । यस अघि फ्रान्स र उरुग्वे क्वाटरफाइनलमा छनोट भइसकेका भने पोर्चुगल र अर्जेन्टिना बाहिरिएका छन् ।