मड्रिड, ३ असोज । एजेन्सी) – कप्तान लिओनेल मेसीको ह्याट्रिक प्रेरित खेलमा बार्सिलोनाले पीएसभीमाथि सहज जित निकालेको छ ।
च्याम्पियन्स लिग अन्तर्गत मंगलबार रातिबाट शुरु भएको समूह चरणको पहिलो खेलमा पीएसभीलाई ४–० को फराकिलो अन्तरले पराजित गर्दा मेस्सीले ह्याट्रिक पुरा गरेको हो ।
खेलको ३१ औं मिनेटमा पीएसभीका डिफेन्डर भिएरगिभरले ओस्मान डेम्बेलेलाई लडाएपछि प्राप्त फ्रिकिकमा मेसीले गोल गरेका थिए । यसै गोलको मद्दतले बार्सिलोनाले पहिलो हाफमा १–० को अग्रता बनाएको थियो । ७४औं मिनेटमा फ्रान्सेली युवा फरवार्ड डेम्बेलेले एकल प्रयासमा दर्शनीय गोल गरे । ७७औं मिनेटमा मेसीले दोस्रो गोल गर्दै खेलमा बार्सिलोनाको जित पक्का गरे । त्यसको दुई मिनेटपछि नै बार्सिलोना १० खेलाडीमा सिमित भएको थियो । डिफेन्डर स्यामुएल उम्टिटीले हिर्भीङ लोजानोलाई रोक्ने प्रयासमा दोस्रो पहेंलो कार्ड खाएपछि बार्सिलोनाले एक खेलाडी कम खेलेको थियो । तर, बार्सिलोनाको गोल गर्ने क्रम रोकिएकन । ८९ औं मिनेटमा मेसीले ह्याट्रिक पूरा गर्ने क्रममा बार्सिलोनालाई ४–० को अग्रता दिलाए ।
समूहको अर्को खेलमा इन्टर मिलानले टोटेनहम हट्स्परलाई २–१ ले पराजित गर्यो । स्पर्सले खेलमा क्रिस्टियन एरिक्सनको गोलमा अग्रता लिएपनि इन्टरले अन्तिम समयमा पुनरागमन गर्यो । इन्टरका लागि कप्तान माउरो इकार्डी र माटिया भेचिनोले गोल गरे । दुवै विजयी टोलीको ३–३ अंक रहेपनि गोल अन्तरका आधारमा बार्सिलोना शीर्षस्थानमा छ ।