चितवन जेठ २३ । नारायणगढ–मुग्लिङ सडकखण्डको ३३.२ किलोमिटर कालोपत्रेले जोडिएको छ ।
मंगलबार राति १२ बजे चेपाङ्ग डाँडाको घुम्तीको ६० मिटर सडकमा पहिलो तहको कालोपत्रे गरेपछि सबै सडक कालोपत्रेले जोडिएको हो । अब सडकखण्डमा कहिँ पनि खाल्डाखुल्डी, धुलो र हिलोको समस्या हुने छैन ।
यससँगै सडक निर्माणका लागि भन्दै विहान १० बजेदेखि दिउँसो ४ बजेसम्म ६ घण्टा गरिएको बन्द आजबाट हटाइएको सडक आयोजनाका इन्जिनियर एवम् सूचना अधिकारी शिव खनालले जानकारी दिए ।
गत पुस १८ गतेबाट दैनिक विहान १० देखि ४ बजेसम्म यातायातका साधन चलाउन बन्द गरेर काम हुँदै आएको थियो । आयोजनाका सूचना अधिकारी खनालले भत्काइएको तीन वर्षपछि सडकखण्ड पूर्णरुपमा कालोपत्रे गर्न सफल भएको जानकारी दिए ।