काठमाडौँ । चर्चित लोक गायक पशुपति शर्माको विवादित ‘लुट्न सके लुट कान्छा’ भन्ने बोलको गीतको विषयले सडकदेखि सदनसम्म तताएको छ । बिहीबार आफ्नो युट्युबमा अपलोडमा गरेको सो गीत शुक्रबार स्वयम् गायक पशुपति शर्माले हटाएपछि सडकदेखि सदनसम्म तताएको हो । सत्तारुढ दलको धम्कीका कारण गायक शर्माले युट्युबबाट हटाएको भन्दै सरकारको कडा आलोचना भइरहेको छ ।

सोमबार बसेको प्रतिनिधि सभाको बैठकमा कांग्रेस सांसद अमरेशकुमार सिंहले गायक शर्मालाई आफ्नो फागुन महिनाको पारिश्रमिक मध्येबाट २५ हजार दिने घोषणा गरेका थिए । उनको सो घोषणाको प्रतिउत्तर दिँदै सत्तारुढ नेकपाका सांसद झपडबहादुर रावलले पशुपति शर्माको सो गीत पूरै गाएमा आफूले सांसद सिंहलाई फागुन महिनाको पूरै तलब नै दिने घोषणा गरे ।

यसै विषयलाई चर्चित गायक प्रमोख खरेलले सांसदहरुलाई गीतमाथि राजनीति नगर्न आग्रह गरेका छन् । उनले आफ्नो क्षेत्रको काम गर्न आग्रह गर्दै अन्यथा यस्ता गीत बन्न नपरोस भन्दै चेतावनी दिए ।

सामाजिक सञ्जाल ट्वीटरमा गायक खरेलले लेखेका छन्, ‘पशुपति शर्मा लाइ २५००० दिने प्रतिपक्षी सांसद र प्रतिउत्तरमा १ महिनाको तलब दिने सत्ताधारी सांसदलाइ अनुरोध । त्यो पैसा आफ्नो क्षेत्रका विकासमा थप्नुस , जनताका लागि काम गर्नुस ताकी फेरि फेरि यस्ता गीत बन्न नपरोस्, त्यसैले कर्म गर्नुस, गीत माथि राजनीति नगर्नुस।’