काठमाडौं । कोरोना भाइरसका कारण सबैभन्दा बढी संक्रमति रहेको स्पेनमा सार्वजनिक यातायातको प्रयोग गर्दा अनिवार्य रुपमा मास्क लगाउनुपर्ने निमम लागू गरिएको छ ।

स्पेनमा सोमबारदेखि लकडाउन खुकुलो पार्ने तयारी सरकारले गरिरहेको छ । सरकारले लकडाउन खुकुलो भएपछि सार्वजनिक यातायातको प्रयोग गर्दा अनिवार्य रुपमा मास्कको प्रयोग गर्नुपर्ने नियम लागू गरेको हो ।

प्रधानमन्त्री पेड्रो सान्चेजले सरकारले ६० लाख मास्क वितरण गर्ने योजना रहेको बताएका छन् । विशेष गरी ती मास्कहरु सार्वजनिक यातायातका स्टेशनहरुमा वितरण गरिने छ । यस्तै थप ७० लाख मास्क स्थानीय अधिकारीलाई प्रदान गर्ने प्रधानमन्त्री सान्चेजले जानकारी दिए ।

दुई साताअघि बालबालिकालाई घरबाहिर एक घन्टाका लागि जान दिएको स्पेन सरकारले शनिबार वयस्कहरुलाई पनि ७ हप्तापछि घरबाहिर निस्कन अनुमति दिएको थियो ।

कोरोना भाइरसको संक्रमणदर घट्न थालेपछि युरोपमा लकडाउन खुकुलो पार्न थालिएको छ । यद्यपि सबै देशमा सामाजिक दुरी भने कायमै राखिएको छ । युरोपमा कोरोना भाइरसका कारण सबैभन्दा बढीको मृत्यु भएको इटलीमा पनि लकडाउन केही खुकुलो पार्ने तयारी छ ।