गुल्मी । गुल्मी दरकार गाउँपालिका–४ स्थित भट्टेचौरका एक वृद्ध दम्पत्तीले सम्बन्ध विच्छेद गरेका छन् । ७२ वर्षीय तीलबहादुर विश्वकर्मा र ६९ वर्षीया बाटुली विश्वकर्माले जिल्ला अदालत गुल्मीमा सम्बन्ध विच्छेद गरेका हुन् ।

आफ्ना पहिलो श्रीमानको २०५२ मृत्यु भएपछि बाटुलीले तीलबहादुरसँग दोस्रो बिहे गरेका थिए । सामान्य मनमुटावका कारण घरमा सधैँ भरि झगडा गरेर बस्नुभन्दा बाच्दासम्म शान्तिसँग बस्न पाइयोस भनेर सम्बन्ध विच्छेद गर्ने सोच बनाएको श्रीमती बाटुली विकले बताइन् ।

यी दम्पत्ती आफ्ना छोराछोरी र नातीसँगै सम्बन्ध विच्छेदका लागि अदालत पुगेको र बाबा आमा दुवैको सहमतिअनुसार सम्बन्ध विच्छेद भएको तीलबहादुरका राइलो छोरा देवेन्द्र विश्वकर्माले बताए । गुल्मी जिल्ला अदालतमा ७२ वर्षको उमेरमा सम्बन्ध विच्छेदको घटना यो पहिलो हो ।

यसअघि ५५ वर्षसम्मका जोडीबीच सम्बन्ध विच्छेद भएको जानकारी पाएको छु, अदालतमा धेरै सम्बन्ध विच्छेदका मुद्दा आउने गर्दछन् तर सम्भवतः ७२ वर्ष उमेरमा भएको सम्बन्ध विच्छेदको यो नै पहिलो घटना हो”, जिल्ला अदालत गुल्मीका तहसिलदार दीपेन्द्रकुमार तीवारीले भने ।