टोकियो/जापान । जापानमा बसोबास गर्ने धेरै विदेशीहरुलाई कोठा/घर भाडामा लिनु तथा एक ठाउँबाट अर्को ठाउँमा बसाई सर्नु एकदमै गाह्रो काम हुनेगर्दछ । त्यसो त घर/कोठा भाडामा लिन या किन्नु सबैकालागि गाह्रो नै हुन्छ तर जापानमा रहेका विदेशीहरुलाई भाषागत ज्ञानको अभाव तथा जापानको कोठा भाडामा दिने र लिने फरक तरिकाको कारणले गर्दा विदेशीहरुलाई तुलनात्मकरुपमा धेरै गाह्रो हुने गर्दछ ।

२७ लाख ६० हजार जनाभन्दा बढी विदेशीहरु बसोबास गर्ने जापानमा,अधिकांस विदेशीहरुलाई जापानमा कोठा कसरी सहजरुपमा खोज्ने ? कोठा खोज्दा के के कुराको ध्यान दिने ?कोठा भाडामा लिन के के चाहिन्छ ? जापानमा कस्तो कोठालाई के नामले चिनिन्छ लगायतका जानकारीको अभाव देखिन्छ । जसका कारण कोठा भाडामा दिने र लिने दुवै पक्षलाई समस्या पर्दै आएको छ ।

यिनै समस्याहरुलाई सम्बोधन गर्दै जापान सरकार भूमि, पूर्वाधार, यातायात तथा पर्यटन मन्त्रालय विभिन्न भाषामा जापानमा कोठा खोज्ने गाईडबुक तयार पारेको छ । अनलाईनमा सजिलै पढ्न सकिने यो गाईडबुक नेपाली भाषामा पनि उपलब्ध छ । यदि तपाई आँफै जानकार बन्न चाहनुहुन्छ या भविष्यमा घर/कोठा सर्दा,भाडामा लिँदा सहज होस भन्ने चाहनुहुन्छ भने यो सामग्री तपाईको लागि उपयोगी हुनसक्छ । हेर्नुहोस् नेपाली भाषामा जापानमा कोठा खोज्ने गाईडबुक

त्यसो त पछिल्ला केहि वर्षयता जापानमा नेपाली फुदोउसान( घरजग्गाको काम गर्ने कम्पनी)हरु पनि नभएका होईनन् । यद्यपी आफैँले जानेर बुझेर घर/कोठा लिन सके जापानको बसाई अझ सरल र सहज हुनेछ ।