एजेन्सी । बलिउडकी नायिका मलाइका अरोडाको गाडी दुर्घटनामा परेको भारतीय सञ्चार माध्यमले जानकारी दिएको छ । गाडी खोपोली एक्सप्रेसवेमा दुर्घटनामा परेको बताइएको छ ।खबर अनुसार तीन गाडी एक–आपसमा ठोक्किएका छन् जसमध्ये एक मलाइका आरोडाको पनि थियो । दुर्घटनाका बेला नायिका गाडीभित्रै थिइन् ।

भारतीय सञ्चार माध्यमका अनुसार मलाइकालाई हल्का चोट लागेको छ । खोपोली प्रहरी स्टेशनका अनुसार नायिकालाई अपोलो अस्पताल लगिएको छ जहाँ उनको उपचार चलिरहेको छ । प्रहरीका अनुसार घटनाको अनुसन्धानपछि उनले एफआईआर दर्ता गर्नेछिन् ।

मलाइकाका साथीले दिए जानकारी

मलाइका अरोडाका नजिकका साथीले इन्डिया टुडेलाई दिएको जानकारी अनुसार मलाइकाको घाउमा टाँका लगाइएको छ र हाल उनको अवस्थामा राम्रो छ । उनका अनुसार मलाइका दुर्घटनाका कारण ‘शक’मा भने परेकी छिन् । टाउको नजिकै उनले कुशन राखेको भएर उनलाई खासै चोट नलागेको पनि ती साथीले जानकारी दिए ।

मलाइकाको रेन्ज रोवर गाडी दुर्घटना भएको हो । दुई गाडीबीच उनको गाडी फस्यो र दुर्घटना भयो । मलाइका कुनै फेशन कार्यक्रममा समावेश हुनका लागि यात्रामा थिइन् ।

एपोलो अस्पतालका अनुसार नायिकाको टाउकोमा हल्का चोट लागेको छ । मलाइकाको सिटी स्क्यान गरिएको छ जसमा उनको रिपोर्ट राम्रो आएको छ । उनलाई शनिबार रातभरी अब्जरभेसनमा राखिएको छ र आइतबार उनलाई डिस्चार्ज गरिने बताइएको छ ।