टोकियो/जापान । गैरआवाशीय नेपाली संघ जापानले यहि अप्रिल ३० तारिख धादिङ् जिल्लाको बिकटमा रहेको गंगाजमुना गाउँपालिकामा निःशुल्क स्वास्थ्य शिविर आयोजना गर्ने भएको छ ।

मातातिर्थ औँसीको अवसर पारी,उत्तरी धादिङ्को गंगाजमुना गाउँपालिकामा अवस्थित श्री मण्डली सकेन्डरी स्कुलमा निःशुल्क बृहत स्वास्थ्य शिविर संचालन गर्न लागिएको हो।

स्वास्थ्य शिविर कार्यक्रम संयोजक तथा एनआरएनए जापानका उपाध्यक्ष राजकुमार अधिकारीका अनुसार, धादिङ राजधानीसंगै जोडिएको जिल्ला भएता पनि अझै उत्तरी क्षेत्रहरु बिकट नै रहेको र त्यहाँका जनताहरुले आवश्यक स्वास्थ्य सेवा प्राप्त गर्न नसकिईरहेको अवस्थालाई मध्येनजर गर्दै यो शिविर आयोजना गरिएको हो ।

शिबिरमा,प्रोफेसर डाक्टर राजेन्द्र प्रसाद बराल( सिनियर कन्सल्ट्यान्ट,क्लिनिकल अंकोलेजिस्ट),डाक्टर बसन्त तुलाचन( रेडियोलोजिस्ट),डाक्टर सुमन कुमार श्रेष्ठ(लेप्रोस्कोपिक एण्ड जनरल सर्जन),डाक्टर निरज केसी( अर्थोपेडिक्स),डाक्टर प्रकाश पौडेल(पल्मोलोजिस्ट),डाक्टर नेत्र बहादुर कार्की ( अर्थोपेडिक्स),डाक्टर धनन्जय सिंह(पाएडिट्रिक), डाक्टर संजना श्रेष्ठ( गाईनेकोलोजी) र डाक्टर दिपेन्द्र लाल श्रेष्ठ लगायतका चिकित्सकहरुको टोलिले परिक्षण परामर्श तथा उपचार गर्नेछन् ।

स्वास्थ्य शिविरमा नेपाल नेश्नल हस्पिटल,रोटरी क्लब अफ दरबारमार्ग, कलंकी,काठमाडौ हेल्थ प्रोफेश्नलको सहकार्य रहेको छ ।