टोकियो/जापान। जापान सरकारले सुस्त अर्थतन्त्रलाई उकास्ने प्रयासमा कोभिड १९ रोकथामका लागि जारी गरेको सीमा नियन्त्रण उपायहरू सहज बनाएपछि जुलाईमा जापान प्रवेश गर्ने विदेशीहरुको संख्या लगातार चौथो महिना पन् १ लाख नाघेको छ ।

जापान राष्ट्रिय पर्यटन संगठनका अनुसार गत महिना कुल १ लाख ४४ हजार ५ सय विदेशीहरुको आगमन भएको छ । यो सन २०२१ को जुलाईको तुलनामा २.८ गुणा बढि हो । तर यसले सन २०१९ को पूर्व-महामारी वर्षको सोही महिनाको तुलनामा ९५.२ प्रतिशतले गिरावट देखाएको छ ।

जापानले जुनमा साना-ठूला भ्रमणका लागि आफ्नो ढोका खोलिदिए पनि गत महिना विदेशी पर्यटकको संख्या ७,९०३ मात्रै ।जापान भ्रमण गर्न आवश्यक जटिल प्रक्रियाहरू(जस्तै कोरोना परीक्षण नतिजा र भिसा प्राप्त गर्न)भएकाले पर्यटक आशाअनुरुप आउन नसकेको अनुमान गरिएको छ । अगस्ट १२ देखि ३१ सम्मको अवधिमा पर्यटन प्रयोजनका लागि जापान प्रवेशका लागि आवेदन दिनेको संख्या ७ हजार ४१२ रहेको संस्थाले जनाएको छ ।

सेप्टेम्बर र अक्टोबर पछिको यात्रा आवेदन संख्या क्रमशः ४,७३० र २,८१० रहेको छ, जसमा अधिकांश दक्षिण कोरियाका छन्। देशको आधारमा, जुलाईमा जापानमा कुल विदेशी आगमनको सबैभन्दा ठूलो संख्या भियतनामबाट २२,७००, दक्षिण कोरियाबाट २०,४०० र चीनबाट १४,८०० थियो, सम्भवतः प्राविधिक इन्टर्न, व्यवसायी वा अन्तर्राष्ट्रिय विद्यार्थीहरूका रूपमा आएको हुनसक्ने आँकलन गरिएको छ ।

यसैबीच, जुलाईमा विदेश गएका जापानीहरूको संख्या २,७७,९०० पुगेको छ, जुन २०२१ को सोही महिनाको तुलनामा ६.४ गुणा बढी थियो। सन् २०१९ को सोही महिनाको तुलनामा यो संख्या ८३.३ प्रतिशतले घटेको छ।