काठमाडौं । घरेलु मैदानमा मंगलबारदेखि आयोजना भएको छैटौं संस्करणको महिला साफ च्याम्पियनसिपमा नेपालले विजयी सुरुवात गरेको छ । फरवार्ड सावित्रा भण्डारी र मिडफिल्डर अनिता बस्नेतको समान दुई गोलमा नेपालले भुटानलाई ४–० ले पराजित गर्दै सानदार सुरुवात गरेको हो ।

त्रिपुरेश्वरस्थित दशरथ रंगशालामा मंगलबार भएको खेलको १२औं मिनेटमा सावित्रा भण्डारीले गोल गर्दै नेपाललाई सुरुवाती अग्रता दिलाइन् । गोलरक्षक सविता मोनगेर अघि बढ्दै बललाई क्लियर गर्न खोजेको अवस्थामा अमिशासँग जुध्दै आएको बललाई सावित्राले खाली पोस्टमा गोल गर्न सफल भइन् ।

पहिलो हाफका एक गोलको अग्रता बनाएको नेपालले दोस्रो हाफको दोस्रो गोलको लागि ६८औं मिनेट कुर्नुपरेको थियो । सावित्राले व्यक्तिगत र टोलीका लागि दोस्रो गोल गर्द नेपाललाई २–० को अग्रता दिलाए । यससँगै सावित्रा भुटानविरुद्धको चौथो खेलमा लगातार गोल गर्न सफल भइन् । उनले यसअघि तेस्रो, चौथो र पाँचौ साफमा गोल गर्न सफल भएकी थिइन् । साफमा भुटानविरुद्ध उनको यो १०औं तथा सम्रगमा राष्ट्रिय टोलीबाट ४०औं गोल हो ।

त्यसपछिको दुवै गोल अनिता बस्नेतको नाममा रह्यो । ७३औं मिनेटमा अनिता बस्नेतले उत्कृष्ट गोल गर्दै नेपाललाई ३–० को अग्रता दिलाइन् । उनले चार डिफेन्डरलाई बिट गर्दै बक्स बाहिरबाट गरेको प्रहारले सिधै जाली चुमेको थियो । ८५औं मिनेटमा अनिता बस्नेतले व्यक्तिगत दोस्रो तथा टोलीका लागि चौथो गोल गर्दै नेपाललाई सानदार जित दिलाए । अनिता केसीको क्रसलाई भुटानी गोलरक्षकले पञ्च गरेर बाहिर फालेको बललाई अनिताले नियन्त्रणमा लिदै गोल गर्न सफल भएकी हुन् ।

यस जितसँगै नेपालले समूह ए मा ३ अंक जोडेको छ । नेपालले अब भदौ २७ गते श्रीलंकाको सामना गर्नेछ । भोली प्रतियोगिताको समूह बी मा दुई खेल हुनेछ । पहिलो खेलमा भारत र पाकिस्तान दिउँसो १ बजे खेल्नेछन् । दोस्रो खेलमा साँझ ५ः३० बजे बंगलादेश र माल्दिभ्सले प्रतिस्पर्धा गर्नेछन् ।