काठमाडौं । भारतसँग पराजित हुँदै नेपाल साफ यू–१७ च्याम्पियनसिपको उपविजेता बनेको छ । बुधबार श्रीलंकाको कोलोम्बोमा भएको फाइनल खेलमा १० खेलाडीमा समेटिएको नेपाल भारतसँग ४–० ले पराजित भएको हो ।

फाइनलको आधा भन्दा बढी समय १० खेलाडीमा सिमित नेपालले समूह चरणमा भारतलाई ३–१ ले हराएको प्रदर्शन दोहोर्याउन सकेन । भारतले १७ औं मिनेटमा बबी सिंहको गोलमा अग्रता लिएको थियो । कौरोउ सिंहले ३० औं मिनेटमा अग्रता दोब्बर पारे ।

नेपालका कप्तान प्रशान्त लक्षमले ३८औं मिनेटमा रातो कार्ड पाए । बल खोस्ने क्रममा उनीमाथि भारतीय खेलाडी लडेर ढाड ठोक्किन पुग्दा रेफ्रीले सिधै रातो कार्ड देखाएका थिए । प्रशान्तले आफ्नो कुनै गल्ती नभएको बताएपनि रेफ्री आफ्नो निर्णयमा अडिग रहे ।

६३औं मिनेटमा वानलालपेका गुइतेले भारतलाई ३–० ले अघि बढाए । इन्ज्युरी समयमा अमनले गोल गरेपछि भारत ४–० को जित दर्ता गर्दै उपाधि जित्न सफल रहयो । यससँगै भारतले समूह चरणमा भोगेको हारको बदला लिन सफल भयो ।