टोकियो/जापान। गत जुलाईमा गोली प्रहार गरी हत्या गरिएका जापानी पुर्व प्रधानमन्त्री सिन्जो आबेको आज राजकिय अन्त्येष्टि हुँदैछ । सत्तारुढ दल लिब्रल डेमोक्रेटिकको पुर्ण समर्थन भएता पनि केहि विपक्षी दल तथा नागरिक समुहहरुको निरन्तरको विरोधका बाबजुद आज दिउँसो विश्वका २ सय भन्दा बढि मुलुकका शिर्षस्थ नेताहरुको उपस्थितिमा अन्तिम बिदाई समारोह आयोजना हुनेछ ।

राजकिय अन्त्येष्टिमा विभिन्न २१८ वटा मुलुक तथा क्षेत्रका प्रमुख व्यक्तिहरु एवं अन्तर्राष्ट्रिय मामलाका प्रमुखहरु सहित करिब ४ हजार २ सय जना सहभागीहरु हुने अपेक्षा गरिएको छ। राजकिय न्त्येष्टिमा, मुख्य क्याबिनेट सचिव एवं अन्त्येष्टि समितिका उपाध्यक्ष, माचुनोले उद्घाटन सम्बोधन गर्नेछन्, र राष्ट्रिय गान र मौन धारण पछि , पूर्व प्रधानमन्त्री आबेको जीवनकालमा उनले गरेका विभिन्न गतिविधिहरु समेटिएको संक्षेप भिडियो प्रस्तुत गरिनेछ।

त्यसपछि, प्रधानमन्त्री किशिदा,अन्त्येष्टि समितिका अध्यक्ष, प्रतिनिधि सभा र परिषद्का सभापति, सर्वोच्च अदालतका प्रधानन्यायाधीश र पूर्व प्रधानमन्त्री सुगा(जो आबे प्रशासनमा मुख्य क्याबिनेट सचिवको रूपमा काम गरेका थिए) लगायतले मन्तव्य राख्ने कार्यक्रम रहेको छ ।

समारोहमा जापानका सम्राट तथा राजपरिवारका सदस्यहरुले श्रद्धांजली अर्पण गरेपछि उपस्थितहरूद्वारा फूलहरू चढाउने कार्यक्रमको थालनी हुनेछ । सामारोह दिउँसो २ बजेबाट सुरु हुनेछ । यसका साथै कार्यक्रम स्थल नजिकैको पार्कमा बिहान १० बजेदेखि साँझ ४ बजेसम्म सर्वसाधारणका लागि फूल चढाउने स्ट्याण्ड पनि बनाईएको छ ।

अर्कोतर्फ २६ तारिखदेखि नै प्रधानमन्त्री किशिदा सहभागी देशका नेताहरुसँग ‘शोक कूटनीति’मा व्यस्त रहेका छन् भने आज बिहान भारतीय प्रधानमन्त्री मोदी र अष्ट्रेलियाका प्रधानमन्त्री अल्बानीजीसँग व्यक्तिगत भेटवार्ता गेरका छन् ।