कतार । एसियाली राष्ट्र दक्षिण कोरियालाई ४–१ को फराकिलो गोल अन्तरले पराजित गर्दै उपाधि दावेदार ब्राजिल फिफा विश्वकप कतार २०२२ को क्वाटरफाइनलमा प्रवेश गरेको छ ।

प्रि–क्वाटरफाइनलमा कोरियालाई हराएर ब्राजिलले क्वाटरफाइनलमा क्रोएसियासँगको भेट पक्का गरेको हो । ब्राजिलको फराकिलो जितमा भिनिसियस जुनियर, नेयमार रिचार्लीसन र लुकास पाक्वेटाले गोल गरे । कोरियाका स्युङ हो पाइकले एक गोल फर्काए । खेलको सुरुवातदेखि नै आक्रामक देखिएको ब्राजिलले सातौ मिनेटमा भिनिसियसको गोलबाट अग्रता लिएको थियो ।

१३औं मिनेटमा रिचार्लीसनलाई पेनाल्टी बक्समा लडाएपछि प्रप्ता पेनाल्टीमा नेयमारले गोल गर्दै टोलीको अग्रता दोब्बर पारे । २९औं मिनेटमा रिचार्लीसनले ब्राजिललाई ३ गोलले अघि राखे । ३६औं मिनेटमा लुकास पाक्वेटाले गोल गरेपछि ब्राजिल पहिलो हाफमै ४–० ले अघि बढ्यो ।

७६औं मिनेटमा स्युङ हो पाइकले गोल गर्दै खेललाई ४–१ को स्थितिमा ल्याएपनि त्यसपछि थप गोल निस्कन नसक्दा ब्राजिल विजयी हुन सफल भयो । ब्राजिलले अब क्वाटरफाइनलमा क्रोएसियाको सामना गर्नेछ । क्रोएसियाले सोमबार राति नै जापानलाई पेनाल्टी सुटआउटमा ३–१ ले हराएर क्वाटरफाइनलमा पुगेको छ ।