काठमाडौं । आइसिसी टि२० विश्वकप एसिया क्षेत्र फाइनल छनोटको सेमिफाइनल खेलमा युएईमाथि ८ विकेटको सानदार जित दर्ता गर्दै नेपालले टी–२० विश्वकपमा स्थान बनाएको छ । नेपालले १० वर्षपछि टि२० विश्वकपमा स्थान बनाएको हो । नेपालले २०१४ मा पहिलो टि२० विश्वकप खेलेपनि त्यसपछि पुन खेल्न सकेको थिएन ।

जितको लागि १ सय ३५ रनको सामान्य विजयी लक्ष्य पछ्याएको नेपालले १७ ओभर १ बलमा २ विकेट गुमाउँदै पूरा गर्यो । कप्तान रोहित कुमार पौडेल २० बलमा २ चौका र २ छक्कासहित ३४ रनमा नटआउट रहे । आसिफ शेख ५१ बलमा ७ चौका र १ छक्कासहित ६४ रनमा नट आउट रहे ।

नेपाललाई ओपनर कुशल भुर्तेल र आसिफ शेखले ३ ओभरमा २६ रनको साझेदारी गर्दै राम्रो सुरुवात दिलाएका थिए । कुशल भुर्तेल ११ रनमा क्याच आउट भए । दोस्रो विकेटका लागि गुलशन झा र आसिफ शेखले ४१ रनको साझेदारी गरे । गुलशनलाई २२ रनमा बोल्ड आउट भए । युएईका निलांश केस्वानी र बासिल हामिदले समान एक एक एक विकेट लिए ।

त्यसअघि माथिल्लो मुलपानी क्रिकेट मैदानमा शुक्रबार टस जितेर पहिला ब्याटिङ गरेको युएईले निर्धारित २० ओभरमा ९ विकेट गुमाउँदै १ सय ३४ रन बनाएको थियो । वृत्य अरविन्दले ५१ बलमा ८ चौका र २ छक्कासहित सर्वाधिक ६४ रन बनाएपनि टोलीलाई जिताउन सकेनन् । अन्य कुनै खेलाडीले राम्रो प्रदर्शन गर्न सकेनन् ।

खालिद शाह ३ रनमा आउट भए । आक्रामक खेल खेलिरहेका वासिम २६ रनमा आउट भएपछि त्यो विकेट नै खेलको टर्निङ प्वाइन्ट बनेको थियो । आसिफ खानलाई १३ रनमा एलबीडब्लू आउट भए । एलिशान शराफु १६ रनमा क्याच आउट भए । अली नासिर ४ रनमा क्याच आउट भए । बासिल हामिद र आयन खान १–१ रनमा आउट भए ।

कुशल मल्लले ३ ओभरमा ११ रन खर्चेर ३ विकेट लिए । सन्दीप लामिछानले ४ ओभरमा १ मेडनसहित १४ रन खर्चेर २ विकेट लिए । कप्तान रोहित पौडेलले १ ओभरमा ६ रन खर्चेर १ विकेट लिए । सोमपाल कामीले ३ ओभरमा १५ रन खर्चेर १ विकेट लिए ।

नेपालले अव उपाधिको लागि फाइनलमा आइतबार ओमानसँग खेल्नेछ । ओमानले पहिलो सेमिफाइनल खेलमा बहराइनलाई १० विकेटले हराउँदै फाइनलमा स्थान बनाएको छ ।