जापान / ओसाका। नेपालीहरुको महान पर्व तिहारको  अवसरमा जापानको ओसाकामा रहेका विभिन्न नेपाली रेस्टुरेण्ट तथा हलाल पसलहरुमा ब्लु ब्वाइज युनियनद्वारा २ दिने देउसीभैलो कार्यक्रम सम्पन्न भएको छ।

परदेशमा रहेर पनि हाम्रो मौलिक परम्परागत चाडपर्व, रितिरिवाज ,कला संस्कृति र मुल्यमान्यताहरुलाई जगेर्ना गर्दै जापानमै हुर्किदैँ गरेका नयाँ पीढीहरुलाई पनि आफ्नो देशको संस्कृति बारे अवगत गराउनु पर्दछ भन्ने उद्देश्यका साथ खेलिएको र उक्त देउसीभैलो कार्यक्रमबाट उठेको रकम जापानमै विभिन्न सामाजिक कार्यमा सहयोग गर्ने योजना रहेको पनि सचिव प्रदीप राज खड्काले जानाकारी दिए।

केहि महिना अघि मात्रै  गठन  भएको यस संस्थाले जापानमा विभिन्न समस्यामा रहेका नेपालीहरुलाई आर्थिक तथा अन्य तबरबाट पनि सहयोग गर्दै आईरहेको छ भने अहिले जापानमै दर्ता प्रकृयाको अन्तिम चरणमा पनि रहेको छ। परदेशी भूमिमा रहेर आफ्नो कार्यव्यस्थताको बाबजुत पनि सक्दो समय निकालेर सामाजिक कार्य र नेपालीहरुमा आउने विभिन्न समस्या तथा कठिन परिस्थितिहरुमा एकजुट भई अघि बढ्नुपर्दछ भन्ने उद्देश्यका साथ राजनीति, भौगोलिक र जातीय सोचभन्दा माथि रहि विशुद्ध सामाजिक सेवाको लागि ब्लु ब्वाइज युनियन  गठन  भएको पनि सचिव खड्काले जानकारी दिए ।