टोकियो/जापान। जापानमा सस्तो र छिटो कपाल काट्ने सेवा उपलब्ध गराउँदै आएको क्युबि हाउस(QB ハウス) ले सन २०२५ को फेब्रुअरीदेखि कपाल काट्ने शुल्क १४०० येन बनाउने भएको छ।

कम्पनीका अनुसार सबै वस्तु तथा सेवाहरुको मूल्य वृद्धि भएपछि,वर्तमान बढ्दो मूल्य वृद्धि तथा समग्र महंगीसंग समायोजन गर्दै हाल कायम १३५० येनबाट बढाएर १४०० येनमा पुर्याउने तय गरिएको हो।

कम्पनीले भनेको छ, वस्तुहरूको मूल्यवृद्धि, कर्मचारीहरूको निरन्तर प्रशिक्षणमा लगानी, र ग्राहक सन्तुष्टिलाई बढावा दिन डिजिटल रूपान्तरण तथा पसलहरूको सुधारका लागि गरिएको लगानीलाई मध्यनजर गर्दै मूल्य समायोजन आवश्यक भएको हो।

“QBハウス” ले सन १९९६ नोभेम्बरमा जापानको पहिलो हेयरकट विशेषज्ञ पसलको रूपमा सेवा सुरु गरेको थियो। अतिरिक्त सेवाहरूलाई हटाएर, दक्षता बढाउँदै, छोटो समयमा गुणस्तरीय कपाल काट्ने सेवा प्रदान गर्दै आएको यो कम्पनीले हाल जापानभर ५६३ र विदेशमा १२८ गरी कुल ६९१ शाखाहरू सञ्चालनमा रहेका छन् ।