टोकियो/जापान। शुक्रबार टोकियोको तामामा रहेको होसेई विश्वविद्यालयको कक्षाकोठामा अन्धाधुन्दा हथौडाले प्रहार गरि ८ जना संगै अध्ययनरत विद्यार्थीहरुलाई घाईते बनाएपछि, दक्षिण कोरियाली २२ वर्षिया विद्यार्थी घटनास्थलबाटै पक्राउ परेकी छिन् ।

घटनास्थलका दृश्यहरुमा केहि विद्यार्थीहरुको टाउकोबाट रगत बगिरहेको बताइएपनि, घाईते भएका सबै विद्यार्थीहरुको अवस्था सामान्य रहेको बताईएको छ। यो घटना कक्षामा हुने बुलिङ(जिस्काउने/दुर्व्यवहार गर्नेजस्ता)कारण घटेको आँकलन गरिएको छ।

अनुसन्धान र अन्य स्रोतहरूका अनुसार, “म माथी हुने बुलिङका कारणले म निराश थिएँ,” संदिग्धले भनिन्, उनले थपिन् कि उनी “रिसले भरिएकी थिइन्” किनभने उनलाई “बेवास्ता गरिएको थियो” र स्कूलमा फेला परेको हथौडाले मानिसहरूलाई प्रहार गर्ने निर्णय गरिन्।

स्रोतहरूले भने कि युवतीले दिउँसो ३:४० बजेतिर समाजशास्त्र विभागको भवनमा कक्षाको समयमा अचानक हथौडा प्रहार गर्न थालेकी थिइन् । उक्त कक्षाकोठामा लगभग १०० जना विद्यार्थीहरु थिए।

अन्य विद्यार्थीहरूका अनुसार, अभियुक्तले केही महिना अगाडि विद्यार्थीहरूलाई आक्रमण तथा अपशब्द प्रयोग गरेर कक्षामा अशान्ति सिर्जना गरेकी थिइन् ।

होसेई विश्वविद्यालयले शुक्रबार राति जारी गरेको विज्ञप्तिमा भनिएको छ, घाइते भएका आठैजना सामान्य उपचारले निको भएका छन् । कसैलाई पनि अस्पताल भर्ना गर्नुपर्ने अवस्था आएन।

“हामी प्रहरी अनुसन्धानमा सहयोग गर्नेछौं र घटनाबाट प्रभावित विद्यार्थी तथा शिक्षकहरूको हेरचाह गर्नेछौं,” साथै, “क्याम्पसको सुरक्षालाई सुनिश्चित गर्न प्रयास गरिनेछ” ।

जापानमा कडा बन्दुक नियन्त्रणका कारण हिंसात्मक अपराधहरू दुर्लभ छन्।तर कहिलेकाहीँ छुराले आक्रमण गर्ने घटना र गोली हान्ने घटना पनि हुने गरेका छन्। जस्तै गत डिसेम्बर महिनामा किताक्युशुको एउटा म्याकडोनाल्ड रेस्टुरेन्टमा एकजना जुनियर हाई स्कूलका विद्यार्थी छुरा हानिएर मारिएका थिए र अर्को एकजना घाइते भएका थिए। उक्त आक्रमणका लागि पछि एक व्यक्तिलाई पक्राउ गरिएको थियो।
त्यसै गरि जनवरी सन २०२२ मा जापानको प्रतिष्ठित टोकियो विश्वविद्यालय बाहिर तीन जनालाई छुरा हानिएको थियो।