टोकियो/जापान। टोकियो दमकल विभागद्वारा सन् २०२४ मा गरिएको आपतकालीन उद्दार संख्या ९ लाख ३० हजार नाघेको छ, जसले लगातार तेस्रो वर्ष नयाँ कीर्तिमान कायम गरेको छ।

टोकियो दमकल विभागका अनुसार सन् २०२४ मा ९ लाख ३५ हजार १ सय ६२ पटक आपतकालीन उद्दार गरिएको थियो, जुन सन् २०२३ को ९ लाख १८ हजार ३सय ११ उद्दारभन्दा बढी हो।

टोकियोको जनसंख्या पछिल्लो १० वर्षमा करिब ३% ले बढेको छ, तर एम्बुलेन्सबाट अस्पताल लगिएका बिरामीहरूको संख्या भने सोही अवधिमा १८.५% ले वृद्धि भएको छ। अस्पताल भर्ना गरिएका बिरामीहरूको वृद्धि दर जनसंख्या वृद्धिदरभन्दा ६ गुणा बढी छ।

उद्दारको संख्या गर्मी र जाडो मौसममा सबैभन्दा बढी रह्यो। विशेष गरी गर्मी याम (जुनदेखि सेप्टेम्बर) मा ७ हजार ९ सय ९३ जना हीटस्ट्रोकका कारण अस्पताल भर्ना गरिएका थिए, जुन हालसम्मकै उच्च संख्या हो।

उमेर समूहअनुसार, ७५ वर्ष वा सोभन्दा माथिका बिरामीहरू करिब ३ लाख ४० हजार रहेका थिए, जुन सम्पूर्ण उद्दारको ४०% भन्दा बढी हो। यो संख्या १० वर्षअघि भन्दा १ लाखले बढी हो।

टोकियो दमकल विभागले आफूलाई एम्बुलेन्स बोलाउनुपर्ने हो कि होइन भन्ने अन्योल भएमा #7119 मा फोन गरेर आपतकालीन परामर्श लिन सिफारिस गरेको छ। तर साँचो आपतकालीन अवस्थामा भने ढिलाइ नगरी तुरुन्तै एम्बुलेन्स बोलाउन अनुरोध गरिएको छ।