टोकियो/जापान । जापानका बाल कल्याण केन्द्रहरूले सन् २०२३ को आर्थिक वर्षमा सामना गरेका बाल दुर्व्यवहारका उजुरीहरूको संख्या रेकर्ड अहिलेसम्मकै उच्च भएको छ। सो अवधिमा २ लाख २५ हजार ५ सय ९ वटा उजुरी परेको सरकारी तथ्यांकले देखाएको छ। तीमध्ये आधाभन्दा बढी मनोवैज्ञानिक दुर्व्यवहारका घटनाहरू रहेका थिए।

स्वास्थ्य, श्रम तथा कल्याण मन्त्रालय र बाल तथा परिवार एजेन्सीले सार्वजनिक गरेको संशोधित तथ्यांकअनुसार, यो संख्या त्यसअघिको आर्थिक वर्षको तुलनामा ५ प्रतिशतले (१० हजार ६६६ घटनाले) बढेको छ। जापानमा सन् १९९० मा अभिलेख राख्न सुरु गरेदेखि लगातार ३३ वर्षसम्म बाल दुर्व्यवहारका घटनाहरू बढिरहेका छन्।

मनोवैज्ञानिक दुर्व्यवहारका घटनाहरू कुल उजुरीको ५९.८ प्रतिशत (१ लाख ३४ हजार ९४८ घटना) रहेका छन्। तीमध्ये ७८ हजार ९१४ घटनामा बालबालिकाहरूको सामु घरेलु हिंसा भएको देखिएको छ।

शारीरिक दुर्व्यवहारका घटना २२.९ प्रतिशत (५१ हजार ६२३) रहेका छन् भने ३६ हजार ४६५ बालबालिका उपेक्षाको सिकार भएका छन्। यस्तै, यौन दुर्व्यवहारका २ हजार ४७३ घटना दर्ता भएका छन्।

बाल कल्याण केन्द्रहरूमा प्राप्त उजुरीमध्ये सबैभन्दा धेरै प्रहरीबाट आएका छन्। त्यस्तै, छरछिमेक तथा चिनजानका व्यक्तिहरूबाट ९.८ प्रतिशत, परिवार तथा आफन्तबाट ८.५ प्रतिशत र विद्यालयबाट ७.४ प्रतिशत उजुरीहरू प्राप्त भएका छन्।

“हामी यी नतिजाहरूलाई गम्भीर रूपमा लिन्छौं र बालबालिकाको जीवन सुरक्षाका लागि बाल कल्याण केन्द्रहरूको प्रणालीलाई अझ प्रभावकारी बनाउने योजना बनाएका छौं,” बाल तथा परिवार एजेन्सीका एक अधिकारीले बताए।

बाल कल्याण केन्द्रहरूले दुर्व्यवहारको शिकार भएका बालबालिकालाई अस्थायी रूपमा संरक्षण दिनसक्ने तथा दुर्व्यवहार भइरहेको घर-परिवारको निरीक्षण गर्नसक्ने अधिकार राख्छन्। सन २०२४ को अप्रिलसम्म जापानभर २३४ बाल कल्याण केन्द्रहरू सञ्चालनमा रहेका छन्।

बढ्दो बाल दुर्व्यवहारका घटनाहरूका कारण यी केन्द्रहरूमा दबाब बढ्दै गएको छ। यसलाई मध्यनजर गर्दै जापान सरकारले बाल कल्याण अधिकृत तथा मनोवैज्ञानिकको संख्या बढाउने योजना बनाएको छ।

यसअघि जारी प्रारम्भिक तथ्यांकमा केही यस्ता घटनाहरू समावेश भएका थिए, जुन अनुसन्धानपछि दुर्व्यवहारको रूपमा नपर्ने ठहर गरिएको थियो। सन् २०२२ को संशोधित तथ्यांक सेप्टेम्बरमा सार्वजनिक गरिएको थियो, भने सन् २०२१ वा अघिका तथ्यांकहरूमा पनि फेरबदल हुनसक्ने जनाइएको छ।