टोकियो/जापान। ग्राहकको दुर्व्यवहार(कस्टमर हरास्मेन्ट) अर्थात् “कस-हारा” रोक्नका लागि, जापानको स्वास्थ्य, श्रम तथा कल्याण मन्त्रालयले व्यवसायहरूका लागि प्रतिकार्य उपाय समेटिएको म्यानुअल विभिन्न उद्योगका लागि तयार गर्ने योजना बनाएको छ। यसै क्रममा, पहिलोपटक सुपरमार्केट उद्योगका लागि निर्देशिका तयार भएको छ।

स्वास्थ्य, श्रम तथा कल्याण मन्त्रालयले आफ्नो वेबसाइटमार्फत सार्वजनिक गरेको यस कस-हारा प्रतिकार्य म्यानुअलमा सुपरमार्केट उद्योगका व्यावसायिक संगठन तथा श्रमिक युनियनहरूसँगको छलफलका आधारमा तय गरिएका उपायहरू समावेश छन्।

यस निर्देशिका अनुसार, अनुचित रूपमा बारम्बार सोधपुछ गरिएमा, व्यवस्थापक (म्यानेजर) ले हस्तक्षेप गरेर ग्राहकलाई सो व्यवहार रोक्न अनुरोध गर्ने। धम्कीपूर्ण वा आक्रामक व्यवहार भएमा, कर्मचारीले “म डराएको छु” जस्ता आफ्ना वास्तविक भावनाहरू स्पष्ट रूपमा व्यक्त गर्ने।

व्यवसायहरूले अपनाउनुपर्ने पहलहरूमा, दुर्व्यवहारको सिकार भएका कर्मचारीहरूको लागि स्पष्ट प्रतिकार्य प्रक्रिया तयार गर्ने।कर्मचारीहरूलाई रोल-प्लेइङ तालिमद्वारा व्यवहारिक प्रशिक्षण दिने।

स्वास्थ्य, श्रम तथा कल्याण मन्त्रालयले सन् २०२४ मा सुपरमार्केट उद्योगमा गरेको एक सर्वेक्षण अनुसार, उत्तर दिएका १०१ कम्पनीमध्ये ५८% ले “कस-हारा रोक्न कुनै निश्तित नियम वा निर्देशिका छैन, त्यसैले समस्या समाधान गर्न कार्यस्थलमा व्यक्तिगत हिसाबले व्यवस्थापन गरिन्छ” भन्ने बताएका थिए।

यसका आधारमा मन्त्रालयले कामदारहरूको सुरक्षाका लागि व्यवसायहरूलाई ग्राहक दुर्व्यवहार विरुद्ध उपाय अपनाउने कानुनी बाध्यता हुने गरी कानुन संशोधन प्रस्ताव हालको संसदमा पेश गरेको छ। साथै, अन्य उद्योगहरूका लागि पनि यस्ता प्रतिकार्य म्यानुअलहरू क्रमशः तयार गर्ने योजनामा छ।