टोकियो/जापान । जापान सरकारले सन् २०२८ को सेप्टेम्बरदेखि नयाँ मोडेलका सवारी साधनहरूमा ब्रेकको सट्टा एक्सेलेरेटर थिचेर दुर्घटना गराउने जस्ता घटनालाई रोक्नका लागि पेडल गलत प्रयोग नियन्त्रण गर्ने उपकरण अनिवार्य गर्ने भएको छ।

यो निर्णय विशेषगरी वृद्ध चालकहरूबाट हुने दुर्घटनाहरूको संख्या घटाउने उद्देश्यले गरिएको हो, तर जापानमा पछिल्ला केही वर्षयता उत्पादन भएका अधिकांश गाडीहरूमा यस्ता उपकरणहरू पहिले नै जडान भएकाले यसले गाडी निर्माता कम्पनीहरूमा खासै असर नपर्ने मन्त्रालयले बताएको छ।

जापानको भौतिक पूर्वाधार, यातायात तथा पर्यटन मन्त्रालयले सडक यातायात सवारी ऐन अन्तर्गत मन्त्रीस्तरीय आदेश संशोधन गरी सबै स्वचालित (अटोमेटिक) गाडीहरूमा उक्त उपकरण अनिवार्य गर्नेछ। यो नियम म्यानुअल ट्रान्समिशन भएका सवारी साधनहरूमा लागू हुने छैन।

नयाँ नियमअनुसार, जब गाडीको अगाडि १.० देखि १.५ मिटरको दूरीमा कुनै अवरोध भेटिन्छ, तब गाडी अचानक अगाडि नबढोस् भन्ने सुनिश्चित गर्न उपकरणले काम गर्नेछ र यदि चालकले पूरा एक्सेलेरेटर थिचे पनि गाडीको गति ८ किलोमिटर प्रतिघण्टाभन्दा कममा सीमित रहनेछ।

यो प्रणाली सक्रिय हुँदा चालकलाई गाडी भित्रै सूचना दिइनेछ र खुट्टा पेडलबाट हटाउन सुझाव दिइनेछ।

मन्त्रालयको सर्वेक्षण अनुसार, सन् २०२३ मा जापानमै उत्पादन भएका ९३.८ प्रतिशत सवारी साधनहरूमा यस्तो उपकरण पहिले नै जडान गरिएको पाइयो, जसले गाडीको अगाडि र पछाडि दुबै दिशामा गति नियन्त्रण गर्न सक्छ।