टोकियो/जापान। चामलको मूल्य लगातार बढिरहेको अवस्थालाई ध्यानमा राख्दै, जापान सरकारले मूल्यलाई स्थिर राख्न थप कदम चाल्नुपर्ने देखिएको भन्दै तेस्रो पटक सञ्चित चामल बजारमा ल्याउने तयारी गरेको छ। चाँडै नै प्रधानमन्त्री इशिबा र कृषिमन्त्री एतोउ बीच अन्तिम छलफल हुने र त्यसपछि निर्णय गरिने अपेक्षा गरिएको छ।

चामलको आपूर्ति सहज बनाउन, सरकारले अहिलेसम्म दुई पटक गरेर २ लाख १० हजार टन सञ्चित चामल बजारमा पठाइसकेको छ, जसअनुसार चामलको खुद्रा बिक्री मार्चको अन्त्यतिरदेखि सुरु भइसकेको छ।

तर, यसको बाबजुद पनि जापानभरका सुपरमार्केटहरूमा चामलको औसत मूल्य मार्च ३० सम्मको एक हप्तामा ५ किलोको प्याकको लागि करसहित ४२०६ येन पुगेको छ र १३ हप्ता लगातार मूल्य वृद्धि भइरहेको छ।यस्तो स्थितिलाई मध्यनजर गर्दै, सरकारले मूल्य स्थिर राख्न तेस्रो पटक सञ्चित चामल बजारमा ल्याउने तयारीमा प्रवेश गरेको हो।

अझ प्रभावकारी बनाउन सरकारले यस वर्षको नयाँ चामल बजारमा आउँदासम्म प्रत्येक महिना निश्चित मात्रामा चामल बजारमा ल्याउने प्रस्ताव पनि विचाराधीन अवस्थामा राखेको छ। यसबारे अन्तिम निर्णय गर्न प्रधानमन्त्री इशिबा र कृषिमन्त्री एतोउबीच चाँडै छलफल हुनेछ।