टोकियो/जापान। जापानको अग्लो पर्वत माउन्ट फुजीमा यस वर्षको ग्रीष्मकालीन पर्वतारोहण सिजनदेखि यमानाशी र सिजुओका दुवै प्रिफेक्चरले आरोहणकर्ताहरूको संख्या व्यवस्थापन गर्नका लागि प्रवेश शुल्क संकलन लगायतका विभिन्न नियमहरू लागू गर्दैछन्। यिनैमध्ये यमानाशी प्रिफेक्चरले अग्रिम बुकिङ प्रणाली लागू गरेको छ, जसअन्तर्गत आज (२४ तारिख) दिउँसोदेखि बुकिङको सुरु भएको छ।

माउन्ट फुजीमा ग्रीष्मकालीन सिजनमा अत्यधिक भीड र नियम उल्लंघन कम गर्न सन् २०२४ देखि यमानाशी प्रिफेक्चरले पाँचौं स्टेसनमा गेट स्थापना गरी, अग्रिम बुकिङ गर्ने व्यवस्था लागू गरेको हो।

यो सिजनको बुकिङ “फुजी तोजान अफिसियल साइट” (富士登山オフィシャルサイト) नामक सरकारी वेबसाइटमार्फत २४ तारिख दिउँसो १ बजेबाट सुरु भएको छ। बुकिङ गर्ने व्यक्तिले पर्वतारोहणको मिति, सहभागी संख्या, दिनभरमै फर्किने कि पहाडको कटेजमा बास बस्ने भन्ने विवरणहरू भरेर प्रति व्यक्ति ¥४,००० (चार हजार येन) को शुल्क तिर्नुपर्नेछ।

यसपटकदेखि विदेशी पर्यटकहरूको सुविधा बढाउन कोरियन र भियतनामी भाषा थपिएको छ, साथै बुकिङपछि मिति परिवर्तन गर्न मिल्ने सुविधा पनि सुरु गरिएको छ।

साथै, पर्वतारोहण गर्दा जाडोबाट बच्ने पोशाक र उपयुक्त जुत्ता प्रयोग गर्नुपर्ने, र रातभर जाग्राम बसेर शिखरतर्फ सिधा जाने “ दान्गान तोजान” (弾丸登山) गर्न नपाईने जस्ता नियमहरू पालना गर्नुपर्ने सहमति बुँदाहरू पनि बुकिङमा समावेश गरिएको छ।

यस सिजनदेखि यमानाशी मात्र नभई सिजुओका प्रिफेक्चरले पनि प्रति व्यक्ति ¥४,००० को प्रवेश शुल्क लिने व्यवस्था गरेको छ। त्यस्तै, दिउँसो २ बजेदेखि भोलिपल्ट बिहान ३ बजेसम्मको समयमा पर्वतमार्ग प्रयोगमा प्रतिबन्ध लगाइएको छ।

सन् २०२४ देखि नियमहरू परिवर्तन भएकाले सम्बन्धित प्रिफेक्चरहरूले पर्वतारोहण अघि सरकारी वेबसाइटमार्फत सबै जानकारी अग्रिम रूपमा जाँच गर्न आग्रह गरेका छन्।