टोकियो/जापान। सरकारी भण्डारणबाट आपूर्ति बढाइ बजार स्थिर बनाउन प्रयास गरिए पनि टोकियोमा चामलको मूल्य अप्रिल महिनामा अघिल्लो वर्षको तुलनामा ९० प्रतिशतभन्दा बढीले वृद्धि भएको शुक्रबार जारी आधिकारिक तथ्यांकले देखाएको छ।

जारी तथ्यांकअनुसार टोकियोका २३ वडामा उपभोक्ता मूल्य सूचकांकमा आधारित गरी चामलको मूल्य ९३.८ प्रतिशतले बढेको देखिएको छ, जुन गत मार्च महिनामा भएको ८९.६ प्रतिशत वृद्धिपछिको सबैभन्दा ठूलो वार्षिक वृद्धि हो। सन् १९७१ यता उपलब्ध तुलनात्मक तथ्यांकमा यति ठूलो वृद्धि पहिलो पटक भएको हो।

आन्तरिक मामिला तथा सञ्चार मन्त्रालयका अनुसार अप्रिल महिनामा ताजा खाद्य वस्तुहरूबाहेकका आधारभूत उपभोक्ता मूल्यहरू टोकियोमा ३.४ प्रतिशतले बढेका छन्। गत महिना यो वृद्धिदर २.४ प्रतिशत रहेको थियो।मूल्य वृद्धि अझै जारी छ किनकि मुद्रास्फीतिका कारण उत्पादन लागत बढ्नुका साथै आगन्तुक पर्यटकहरूको वृद्धि हुनुले उपभोगसमेत बढाएको छ।