टोकियो/जापान। जापानमा सक्रिय नेपाली संस्था ‘धादिङ समाज जापान’ले आपतकालीन अवस्थाहरूमा सहयोग गर्नका लागि विशेष राहत कोष स्थापनाको घोषणा गरेको छ। प्रारम्भिक चरणमा ६ लाख (६०万円) को राहत कोष खडा गरिने जानकारी समाजका अध्यक्ष बिमल श्रेष्ठले दिएका छन्।

श्रेष्ठका अनुसार, भइपरी आउने प्राकृतिक विपत्ति, दुर्घटना वा आकस्मिक अवस्थाहरूमा बारम्बार चन्दा संकलन गर्नुपर्ने बाध्यताबाट मुक्त हुने उद्देश्यले यो राहत कोष स्थापनाको निर्णय गरिएको हो। “कोष खडा भएपश्चात  समाजमा आउने यस्ता संकटका समयमा यही कोषबाट आवश्यक सहयोग गरिनेछ,” उनले बताए।

धादिङ जिल्लाबाट जापानमा रहेका सम्पूर्ण नेपालीहरू, साथै समाजका कार्यसमिति, सल्लाहकार, संरक्षक लगायत सबैलाई सहयोग गर्न आग्रह गर्दै अध्यक्ष श्रेष्ठले यो पहललाई दीर्घकालीन रुपमा प्रभावकारी बनाउने प्रतिबद्धता जनाएका छन्।

सन् २०१३ मा स्थापना भएको धादिङ समाज जापान जापान सरकारले मान्यता दिएको एनपिओ होउजिन (NPO法人) को रुपमा दर्ता भई हालसम्म सक्रिय रूपमा सामाजिक कार्यमा संलग्न रहँदै आएको छ। समाजले विगतमा पनि विभिन्न आपतकालीन अवस्थामा सहयोग गर्दै आएको इतिहास रहेको छ।

समाजले निकट भविष्यमै राहत कोष संकलनको कार्यविधि सार्वजनिक गर्ने जानकारी पनि दिएको छ।