टोकियो/जापान। सन् २०२४ मा गरिएको एक सरकारी सर्वेक्षण अनुसार, जापानमा करिब ३९ प्रतिशत मानिसहरुले एक्लोपन महसुस गर्ने बताएका छन्। गत वर्ष अप्रिलदेखि लागू भएको एक्लोपनको समस्या समाधान गर्ने कानुनले खास प्रभाव पार्न अझ बाँकी देखिएको छ।

सन् २०२४ को सर्वेक्षणमा “बारम्बार वा सधैं,”  वा “कहिलेकाहीँ मात्र” एक्लोपन महसुस गर्ने व्यक्तिहरूको संख्या ३९.३ प्रतिशत थियो, जुन सन् २०२३ को सर्वेक्षणको तुलनामा कुनै परिवर्तन आएको थिएन। सन् २०२१ देखि सुरु गरिएको यो अध्ययनमा यो आँकडा खासै परिवर्तन भएको छैन।

यसपटकको सर्वेक्षणले पहिलो पटक स्मार्टफोनको प्रयोग र एक्लोपनको अनुभूतिबीचको सम्बन्ध पनि विश्लेषण गरेको थियो। दैनिक आठ घण्टाभन्दा बढी स्मार्टफोन प्रयोग गर्नेहरूमा १३.३ प्रतिशतले आफूले “बारम्बार वा सधैं” एक्लोपन महसुस गर्ने बताएका छन्।सातदेखि आठ घण्टा प्रयोग गर्नेहरूमा यो प्रतिशत ९.५ थियो, जुन कम प्रयोग गर्नेहरूमध्ये भन्दा उच्च देखिएको छ।

एक्लोपनको मुख्य कारणहरूमा, सबैभन्दा धेरै उल्लेख भएको कारण २४.६ प्रतिशतले “परिवारको सदस्य गुमाउनु” रहेको छ। त्यसपछि “एक्लै बस्नु,” “स्कूल वा जागिर परिवर्तन वा छोड्नु,” र “गम्भीर शारीरिक वा मानसिक स्वास्थ्य समस्या” जस्ता कारणहरू पनि उल्लेखनीय रूपमा देखिएका छन्।

यो चौथो पटक गरिएको यस्तो सर्वेक्षण हो, जसमा जापानभरिबाट १६ वर्ष वा सोभन्दा माथिको उमेर समूहका २० हजार व्यक्तिहरूलाई छानिएको थियो। सन् २०२४ को डिसेम्बरसम्मको अवस्था सोधिएको यो सर्वेक्षणमा ५४.४ प्रतिशतले उत्तर दिएका थिए।

कोरोना महामारीपछिको समयलाई ध्यानमा राखेर बनाइएको एक्लोपन भिन्न कानुन अनुसार, स्थानीय सरकारहरूलाई सार्वजनिक तथा निजी क्षेत्रका संस्थाहरू मिलाएर सहयोग अभियान अघि बढाउने क्षेत्रीय समूहहरू गठन गर्न भनिएको छ।