टोकियो/जापान । जापानमा सक्रिय नेवाः समुदायको संस्था नेवा: अन्तर्राष्ट्रिय फोरम जापानले २५६९औं बुद्ध जयन्ति यस वर्ष पनि विशेष कार्यक्रम सहित मनाउने  भएको छ।कार्यक्रम टोकियोको शिबुया-कु, हातागायामा अवस्थित “गोतामी बिहार” परिसरमा आयोजना गरिने संस्थाले जानकारी दिएको छ।

संस्थाका अध्यक्ष रूपेश डंगोलले भने – “बुद्धको जन्मस्थल नेपाल हो। हामी नेपाली जहाँ भए पनि बुद्ध जयन्ति मनाउनु हाम्रो कर्तव्य हो। त्यसैले संस्थाको स्थापना कालदेखि नै हामी यो दिवस श्रद्धापूर्वक मनाउँदै आएका छौं।”

बुद्ध जयन्ति समारोहमा बुद्धको जन्म, जीवन र शिक्षाका बारेमा विशेष चर्चा गरिनुका साथै बौद्ध धर्मगुरुहरूबाट पूजा, ध्यान र प्रार्थनासमेत गरिनेछ।

संस्थाका महासचिव शिव तण्डुकारले जापानमा हुने सहभागीता बारे यसो भने- “कार्यक्रममा नेपाली समुदायका साथसाथै जापानीहरूको पनि उत्साहजनक सहभागिता रहनेछ। यस अवसरमा बुद्धको वास्तविक जन्मस्थल नेपाल हो भन्ने सन्देश जापानी समुदायसम्म पुर्‍याउने यो उत्कृष्ट अवसर पनि हो।”

कार्यक्रममा विशेष दीप प्रज्वलन र दिवंगत आत्माहरूको शान्तिका लागि पूजासमेत गरिनेछ। सचिव रवि महर्जनले दिवंगत आफन्तजनको नाममा पूजा गराउन चाहने जापानस्थित नेपालीहरूलाई संस्थाका पदाधिकारीहरूसँग सम्पर्क गर्न अनुरोध गरेका छन् ।
⚫︎मिति : २०२५ मे २५ (आइतबार)
⚫︎समय : बिहान ९ बजे
⚫︎स्थान : गोतामी बिहार, हातागाया, शिबुया-कु, टोकियो
(ゴータミ精舎　東京都渋谷区幡ヶ谷1−23−９)
⚫︎सम्पर्क : 080-6555-6667 / 080-4323-3201