टोकियो/जापान। बैंक अफ जापान (BOJ) का गभर्नर काजुओ उएदाले देशको अर्थतन्त्र अपेक्षानुसार सुधारिएमा नीतिगत ब्याजदर अझै बढाउन सकिने संकेत दिएका छन्।उनको यो भनाइपछि जापानी येनको भाउ डलरको तुलनामा सुधार हूँदै प्रति १ डलर बराबर १४२.१२ येन सम्म पुग्यो।

उएदाले टोकियोमा आयोजित एक अन्तर्राष्ट्रिय सम्मेलनमा भने, “यदि आर्थिक आँकडाले हाम्रो अपेक्षा पुष्टि गर्यो भने, हामी आवश्यकतानुसार मौद्रिक नीतिमा समायोजन गर्नेछौं,”

उनका अनुसार जापानले अहिले खाद्य मूल्यवृद्धि मार्फत दोस्रो आपूर्ति धक्का भोगिरहेको छ, जसको असर मुद्रास्फीतिमा पर्ने भएकाले सावधानी आवश्यक छ।हालै अप्रिल महिनाको तथ्यांक अनुसार, ताजा खाद्यबाहेकको मुद्रास्फीति ३.५ प्रतिशत पुगेको छ, जुन लगातार ३ वर्षदेखि बैंकको २% लक्ष्यभन्दा माथि छ।

बैंकले हालै आर्थिक वृद्धिको अनुमान घटाउँदै मुद्रास्फीति लक्ष्य पुग्ने समय एक वर्ष पछाडि सारेको छ। तर, पछिल्ला घटनाक्रम हेर्दा यसै वर्षभित्रै फेरि ब्याजदर बढ्ने सम्भावना देखिएको छ।

बैंक अफ जापानले आगामी जुन १७ को बैठकमा नीति स्थिर राख्ने तर सरकारी ऋणपत्र खरिदमा कटौती गर्ने योजना सार्वजनिक गर्ने अपेक्षा गरिएको छ।