टोकियो/जापानं जापानले सन् २०२४ को आर्थिक वर्षमा विदेशी यात्रुहरूबाट लिएको प्रस्थान करबाट अहिलेसम्मकै उच्च आम्दानी गरेको छ। यात्रुहरूको संख्यामा उल्लेखनीय वृद्धि भएका कारण यो कर राजस्व नयाँ कीर्तिमा पुगेको, वित्त मन्त्रालयले

जानकारी दिएको छ।

जसअनुसार, अप्रिलदेखि मार्चसम्मको आर्थिक वर्षको अन्तिम हिसाब अझै बाँकी भए पनि मे महिनासम्मको संकलन अनुसार राजस्व ४८ अर्ब १० करोड येन पुगेको छ। यो रकम सन् २०१९ को अघिल्लो कीर्तिमान ४४ अर्ब ३० करोड येनभन्दा धेरै हो। अन्तिम तथ्यांक पछि सार्वजनिक गरिनेछ।

सरकारले जापानबाट बाहिरिने प्रत्येक यात्रु (राष्ट्रियता जेसुकै भए पनि) बाट १,००० येन अन्तर्राष्ट्रिय पर्यटक कर उठाउँछ। यो कर सन् २०१९ मा सबैभन्दा धेरै उठेको थियो तर कोरोनाका कारण त्यसपछि निकै घटेको थियो। अहिले भने पुनः वृद्धि भइरहेको छ।

जापानमा हाल कमजोर येन तथा हवाई उडानहरू बढेका कारण पर्यटकहरूको आगमनमा तीव्र वृद्धि भएको जापान राष्ट्रिय पर्यटन संगठन (JNTO) को विश्लेषण छ।

प्रधानमन्त्री शिगेरु इसिबाले पर्यटन प्रवर्द्धन र प्रमुख पर्यटकीय क्षेत्रहरूमा भीड व्यवस्थापनका लागि थप स्रोत जुटाउन बिदाइ कर वृद्धिको सम्भावनाबारे संकेत गरिसकेका छन्।