टोकियो/जापान। हङकङ एयरलाइन्सले यो गर्मी याममा जापानमा ठूलो भूकम्प र सूनामी आउने अफवाह फैलिएको कारण देखाउँदै जुलाई र अगस्ट महिनाका लागि जापानको दक्षिणी क्षेत्रतर्फका सबै उडानहरू रद्द गर्ने निर्णय गरेको एनएचएके वर्ल्डमा खबर प्रकाशन भएको छ।

हङकङमा फैलिएको उक्त हल्लाले गर्दा जापानतर्फको पर्यटकको माग घटेको छ, जसले गर्दा मे महिनादेखि हङकङ र जापानका विभिन्न गन्तव्यहरूबीचको उडान संख्या पनि घटेको छ।

एयरलाइन्सले जुलाई र अगस्टमा कागोशिमा र कुमामोतो प्रिफेक्चरतर्फका सबै उडानहरू रद्द गर्ने निर्णय गरेको हो।कागोशिमा मार्गमा भने एयरलाइन्सले गत वर्ष वसन्त ऋतुमा चार वर्षपछि पुनः उडान सुरु गरेको थियो।यात्राको उच्च मागका कारण, एयरलाइन्सले डिसेम्बर महिनादेखि साप्ताहिक उडान संख्या तीनबाट चार पुर्‍याएको थियो।

तर यस वसन्तयामदेखि यात्रु संख्या घट्दै गएको एयरलाइन्स स्रोतहरूले बताएका छन् । जापानमा एक कमिक्स(माङ्गा) राईटरले जापानमा निकट भविष्यमै इतिहासकै ठूलो प्राकृतिक विपत्ती आउने भविष्यवाणी गरेको बताइएपछि भूकम्पसम्बन्धी हल्ला फैलिन सुरु भएको छ।

हङकङस्थित कागोशिमा प्रिफेक्चरल अफिसले एयरलाइन्स तथा अन्य सम्बन्धित निकायहरूलाई सकेसम्म चाँडो उडान पुनः सुरु गर्न आग्रह गर्ने जनाएको छ।

जापान नेशनल टुरिज्म अर्गनाइजेशन (JNTO) ले भने यो हल्लामा वैज्ञानिक कुनै आधार नरहेको स्पष्ट पार्दै, आधिकारिक संस्थाबाट प्राप्त वैज्ञानिक सूचनाको आधारमा यात्रा योजना बनाउन आग्रह गरेको छ।