टोकियो/जापान। जापानमा सन् २०२६ अप्रिलदेखि साइकल चढ्नेहरूको लागि नयाँ कडा नियम लागू हुने भएको छ। अब ट्राफिक नियम उल्लङ्घन गरेमा साइकल चालकले पनि कार चालकसरह ‘ निलो चिट’ पाउनेछन् र जरिवाना तिर्नुपर्नेछ।

पैदलमार्गमा साइकल चलाउनेलाई ६ हजार येन जरिवाना लाग्नेछ। यो नियम लागू भएपछि टोकियो लगायतका सहरहरूमा धेरै साइकल यात्रीहरू चिन्तित देखिएका छन्।

यस नियम अनुसार कसैले मोबाइल हेर्दै साइकल चलाएमा १२ हजार येन, इयरफोन लगाएर साईकल चलाएमा ५ हजार येन, सडकमा उल्टो दिशाबाट साईकल चलाउँदा ६ हजार येन, र समूहमा सँगै साइकल चलाउँदा ३ हजार येन जरिवाना तिर्नु पर्नेछ।

सबैभन्दा धेरै पाइने उल्लङ्घन भने पैदलमार्गमा साइकल चलाउने हो। अभिभावकहरू खासगरी यस नियममा चिन्तित छन्। उनीहरूका अनुसार बच्चाहरूलाई मुख्य सडकमा साइकल चलाउन पठाउनु खतरनाक छ। तर पैदलमार्गमा साईकल चलाउँदा अब जरिवाना लाग्नेछ।

“हामी ठूला मान्छे केही न केही गर्न सक्छौं, तर बच्चाहरूको सुरक्षाका लागि पैदलमार्गमै चलाउनुपर्ने हुन्छ,” एकजना बाबुले भनेका छन्।

सरकारले भने ट्राफिक सुरक्षाका लागि नयाँ नियम आवश्यक भएको स्पष्ट पारेको छ।