टोकियो/जापान। जापानमा गर्मीका कारण अवस्था जटिल बन्दै गएको छ। अग्नि तथा प्रकोप व्यवस्थापन एजेन्सीका अनुसार जुन १६ देखि जुन २२ सम्मको एक हप्तामा देशभरि ८ हजार ६०३ जना मानिसहरुलाई गर्मीले निम्त्याउने लक्षण जस्तै हीटस्ट्रोकका कारण अस्पताल भर्ना गरिएको छ।यो संख्या अघिल्लो साताको तुलनामा नौ गुणा बढी हो।

क्षेत्रगत विवरणअनुसार सबैभन्दा धेरै बिरामी टोकियोमा रहेका छन्, जहाँ ८९६ जना उपचारका लागि अस्पताल लगिएको छ। त्यसपछि आइचि प्रिफेक्चरमा ७०६ जना र साइतामा प्रिफेक्चरमा ६४८ जना प्रभावित भएका छन्।

१४ वटा प्रिफेक्चरहरुमा गरी कुल १८ जनाको ज्यान गएको पुष्टि गरिएको छ। मृतकमा कानागावा, ओसाका र ओकिनावाजस्ता प्रान्तहरूका नागरिकहरू छन्।

गम्भीर अवस्थामा परेका २१० जनालाई तीन हप्ताभन्दा बढी अस्पतालमा राखेर उपचार गर्नु परेको छ भने ३ हजार ३२ जनालाई छोटो अवधिका लागि अस्पताल भर्ना गरिएको छ।उमेर समूह अनुसार हेर्दा, ६५ वर्ष वा सोभन्दा माथिका वृद्धवृद्धा प्रभावितहरूको ठूलो हिस्सा रहेका छन्। कुल संक्रमितमध्ये ५ हजार ३१६ जना अर्थात् ६१ दशमलव ८ प्रतिशत वृद्धवृद्धा रहेका छन्।

एजेन्सीले नागरिकहरूलाई प्रशस्त पानी पिउन, निदाउँदा एयर कन्डिसनरको प्रयोग गर्न र अन्य पूर्वसावधानी अपनाउन आग्रह गरेको छ।