टोकियो/जापान। लगातार अत्यधिक गर्मी भइरहेका बेला, आज जुलाई ६ तारिख पनि जापानको पश्चिमी र पूर्वी क्षेत्रहरूमा अधिकतम तापक्रम ३५ डिग्री सेल्सियसभन्दा माथि पुग्ने सम्भावना रहेको छ। यसैले हिटस्ट्रोक(गर्मीबाट हुने बिरामी)बाट बच्न विशेष सावधानी अपनाउन मौसम विभागले आग्रह गरेको छ।

जापान मौसम विभागका अनुसार ६ तारिखमा पनि पश्चिम जापान उच्च वायुमंडलीय दबाव प्रणालीको प्रभावमा आउनेछ, जसका कारण प्रायः क्षेत्रहरूमा आकाश सफा रहनेछ र तापक्रम अझै बढ्नेछ।
आजको अनुमानित अधिकतम तापक्रम- नागोया,क्योटो र कोफुमा ३७ डिग्री,हिरोशिमा र ताकामाचुमा ३६ डिग्री,टोकियो,ओकायामा र फुकुओकामा ३५ डिग्री, ओसाका र यामागातामा ३४ डिग्री, तोयामा र माचुएमा ३३ डिग्री कायम रहने अनुमान गरिएको छ ।

उच्च गर्मी बढेपछि जापानको – टोकियो, चिबा, खानागावा, यामानाशी, आइची, मिए, वाकायामा, हिरोशिमा, सिमाने, तोकुसिमा, खागावा, एहिमे, तथा क्युशु क्षेत्रमा हिटस्ट्रोक चेतावानी जारी गरिएको छ। विशेषगरी टोकियो र खानागावामा यो सिजनमा पहिलो पटक यस्तो अर्लर्ट जारी गरिएको हो।

हिटस्ट्रोकबाट बच्न निम्नलिखित सावधानीहरु अपनाउनुहोस – घरभित्र वा अफिसमा एयर कन्डिसनर (AC) को उचित प्रयोग गर्नुहोस्।प्रशस्त मात्रामा पानी र नुनयुक्त पेय पदार्थ पिउनुहोस्।बाहिर काम गर्दा बारम्बार विश्राम लिनुहोस्।बालबालिका, वृद्ध तथा बिरामीहरूलाई विशेष ध्यान दिनुहोस्।