टोकियो/जापान। जापानमा जुलाई महिनामा विदेशी पर्यटकहरुको संख्या गत वर्षको तुलनामा करिब ४.४ प्रतिशतले बढेर ३४ लाख पुगेको सरकारी अनुमान बुधबार सार्वजनिक गरिएको छ। यो संख्या जुलाई महिनाको लागि अहिलेसम्मकै सबैभन्दा ठूलो हो। अन्य मुलुकहरूमा विद्यालयको बिदा हुने समयसँगै जापान भ्रमण गर्ने पर्यटकको संख्यामा उल्लेख्य वृद्धि भएको हो।

हालका वर्षहरूमा जापानको सांस्कृतिक लोकप्रियता, विशेषगरी एनिमे, र येनको अवमूल्यनले गर्दा जापान प्रमुख पर्यटकीय गन्तव्य बन्न पुगेको छ।

मुलुक र क्षेत्रगत आधारमा हेर्दा, चीन पहिलो स्थानमा रह्यो जसबाट करिब ९ लाख ७४ हजार ५०० पर्यटक जापान आएका थिए। यो अघिल्लो वर्षको तुलनामा २५.५ प्रतिशत बढी हो। दोस्रो स्थानमा दक्षिण कोरिया रह्यो जसबाट ६ लाख ७८ हजार ६०० पर्यटक आएका थिए, तर यो अघिल्लो वर्षको तुलनामा १०.४ प्रतिशतले घटेको देखियो। तेस्रो स्थानमा ताइवान रह्यो जहाँबाट ६ लाख ४ हजार २०० आगन्तुक आएका थिए। यो ५.७ प्रतिशत वृद्धि हो र मासिक रेकर्ड पनि बनाएको छ। यसको मुख्य कारण जापान र ताइवानबीच थप हवाई उडानहरू सञ्चालन हुनु हो।

जापान नेशनल टुरिज्म अर्गनाइजेशन (JNTO) का अनुसार अमेरिका, फ्रान्स, इन्डोनेसियासहित १५ बजारले जुलाई महिनामा नयाँ आगन्तुक रेकर्ड कायम गरेका छन्।

तर नकारात्मक पक्षमा हेर्दा, हङकङ र दक्षिण कोरियाबाट भ्रमण गर्ने मागमा ठूलो असर परेको देखियो। सामाजिक सञ्जालमा जुलाई महिनामा जापानमा ठूलो प्राकृतिक विपत्ति आउने भन्ने हल्ला फैलिएको थियो। जापानी कलाकार रियो ताचुकीको ‘द फ्युचर आइ स’ नामक मांगामा जुलाई ५ मा भूकम्प आउने भविष्यवाणी गरिएको भन्दै हल्ला फैलिएपछि केही नियमित उडानहरू समेत रद्द भएका थिए।

जापान पर्यटन संगठनले विज्ञप्तिमा रणनीतिक रूपमा इनबाउन्ड पर्यटन प्रवर्द्धन गर्दै बजारको प्रवृत्तिलाई नजिकबाट विश्लेषण गर्ने जनाएको छ। जापान सरकारले सन् २०२५ को अन्त्यसम्मको तीन वर्षे योजनाअन्तर्गत प्रत्येक पर्यटकको खर्च २ लाख येन (करिब १ हजार ३५५ डलर) पुर्‍याउने र क्षेत्रीय क्षेत्रमा औसत बसाइलाई सन् २०१९ को स्तर (१ लाख ५९ हजार येन खर्च र १.४ रात बसाइ) भन्दा बढाएर २ रात पुर्‍याउने लक्ष्य राखेको छ।