टोकियो,जापान। शिक्षा मन्त्रालयको सर्वेक्षणअनुसार सन् २०२४ मे महिनासम्म जापानमा प्राथमिक र जुनियर हाइस्कूल उमेरका करिब ८ हजार ४३२ जना विदेशी बालबालिका विद्यालयमा पढिरहेका छैनन् वा नपढेको हुनसक्ने देखिएको छ। यो अघिल्लो वर्षको सर्वेक्षणभन्दा १६९ ले कम हो।

जापानमा प्राथमिक वा जुनियर हाइस्कूलमा पढ्ने अधिकार पाउने गरी दर्ता भएका विदेशी बालबालिकाको कुल संख्या १ लाख ६३ हजार ३५८ पुगेको छ, जुन अघिल्लो वर्षभन्दा १२ हजार ६६३ ले बढेको हो।त्यसमध्ये १ लाख १४ हजार ७९२ जना प्राथमिक तहका र ४८ हजार ५६६ जना जुनियर हाइस्कूलका विद्यार्थी छन्। यी दुवैमा क्रमशः ८ हजार २५२ र ४ हजार ४११ को वृद्धि भएको हो।

यो सर्वेक्षण देशभरका १,७४१ वटा नगरपालिकाका शिक्षा समितिहरूमा गरिएको थियो। पहिलोपटक सन् २०१९ मा गरिएको सर्वेक्षणमा करिब २० हजार विदेशी बालबालिकालाई विद्यालय नपढेको वा कतै पनि नपढेको हुनसक्ने देखाइएको थियो। त्यसयता प्रत्येक नगरपालिकाको शिक्षा समितिहरूले अवस्थालाई बुझ्दै गएपछि यो संख्या २०२२ यता करिब ८ हजार वरिपरि देखिँदै आएको छ।

मन्त्रालयले यसपटक देखिएको संख्यामा कमी आउनु स्थानीय निकायहरूले विद्यालयमा उपस्थितिको अवस्थाबारे जानकारी लिनु र अध्ययन गर्ने अवसर सुनिश्चित गर्ने जानकारी फैलाउने प्रयासको परिणाम हो भन्ने विश्वास लिएको छ।