टोकियो,जापान। नेवा: अन्तर्राष्ट्रिय फोरम जापानले हरेक वर्षझैँ यस वर्ष पनि टोकियोमा सामूहिक म्हँ: पूजा तथा नेपाल संवत् ११४६ को शुभकामना आदानप्रदान कार्यक्रम आयोजना गर्ने भएको छ।

यस वर्षको कार्यक्रम अक्टोबर २५ तारिख (शनिबार) टोकियोको कितासुना स्थित दान्ची हलमा आयोजना गरिनेछ।म्हँ: पूजाको महत्वका बारेमा संस्थाका अध्यक्ष रूपेश डंगोलले जानकारी दिँदै भन्नुभयो —“नेपाल एक बहुभाषिक, बहुधार्मिक र बहुसांस्कृतिक देश हो। ती विविध संस्कृतिमध्ये नेवाः समुदायको स्वन्ति (तिहार) अथवा म्हँ: पूजा एक महत्वपूर्ण पर्वका रूपमा मनाइन्छ।

म्हँ: पूजा अर्थात् आफ्नै शरीरको पूजन गर्ने संस्कार हो, जसले शरीर शुद्ध रहोस्, रोगव्याधि नलागोस्, र लागेको रोग पनि निको होस् भन्ने कामना गरिन्छ।”यस कार्यक्रममा नेवार समुदायका साथै अन्य जाति तथा समुदायका व्यक्तिहरूले पनि सहभागिता जनाउन सक्नेछन्। नेवाः परम्परा, कला, संस्कृति तथा खानामा रुचि राख्ने इच्छुक व्यक्तिहरूले आयोजक संस्थासँग सम्पर्क गर्न सक्नेछन्।

म्हँ: पूजामा सहभागी हुन इच्छुक व्यक्तिहरूले पहिल्यै सम्पर्क गरी आफ्नो नाम दर्ता गराउनु पर्नेछ।म्हँ: पूजाका लागि प्रत्येक सहभागीको लागि मण्डप तयार गर्नुपर्ने भएकाले, सहभागी संख्या अग्रिम रूपमा निश्चित गर्न आवश्यक रहेको संस्थाले जनाएको छ।

अग्रिम सम्पर्क नगरेका सहभागीहरूका लागि मण्डप व्यवस्था गर्न कठिनाइ हुने भएकाले, इच्छुक सबैलाई नाम दर्ता गराउन संस्थाका महासचिव शिव तण्डुकारले अनुरोध गर्नुभएको छ।सहभागिताका लागि नाम दर्ता गर्न तथा कार्यक्रमसम्बन्धी थप जानकारीका लागि संस्थाका प्रतिनिधिसँग सम्पर्क गर्न सक्नुहुनेछ।
सम्पर्क नंः- ०८०-६५५५-६६६७ / ०७०-१२११-१५०२ / ०८०-४३२३-३२०१ / ०८०-५०१५-८९३९