टोकियो,जापान। जापानमा बसोबास गर्ने वैध विदेशी नागरिकहरूको संख्या इतिहासकै उच्च स्तरमा पुगेको छ। जापानको अध्यागमन एजेन्सीले शुक्रबार सार्वजनिक गरेको तथ्यांकअनुसार, जुन महिनाको अन्त्यसम्म जापानमा ३९ लाख ५६ हजार ६ सय १९ जना विदेशी नागरिकहरु वैधानिकरुपमा बसोबास गरिरहेका छन्। यो संख्या गत वर्षको अन्त्यको तुलनामा ५ प्रतिशत (१ लाख ८७ हजार) ले बढेको हो।

यो वृद्धिसँगै जापानमा विदेशी कामदारको संख्यामा पनि उल्लेखनीय वृद्धि भएको छ। सन २०१९ मा सुरु गरिएको “विशेष दक्ष कामदार (Specified Skilled Worker)” भिसा श्रेणी अन्तर्गत बसोबास गर्नेहरूको संख्या १८.२ प्रतिशतले बढेर ३ लाख ३६ हजार १ सय ९६ पुगेको छ। तीमध्ये ३ हजार ७३ जना ले उच्च श्रेणी (नम्बर २)को भिसा लिएका छन्।

आवासीय स्थिति अनुसार स्थायी आवास अनुमती प्राप्त गर्ने विदेशीहरूको संख्या ९ लाख ३२ हजार ९० पुगेको छ। त्यसपछि इन्जिनियर, मानविकी विशेषज्ञ र अन्तर्राष्ट्रिय सेवा (Engineers, Specialists in Humanities & International Services) अन्तर्गतका व्यक्तिहरू ४ लाख ५८ हजार १०९ पुगेका छन्, जसमा अनुवादक र अन्य सीपमूलक पेशा समावेश रहेका छन्।

तेस्रो ठूलो समूह भने जापानको प्राविधिक प्रशिक्षार्थी अन्तर्गतका ४ लाख ४९ हजार ४३२ जना रहेका छन्। यो संख्या भने १.६ प्रतिशत घटेको छ। यो कार्यक्रम सन २०२७ अप्रिलमा समाप्त गर्ने तयारीमा सरकारले काम गरिरहेको छ।

जापानमा रहेका विदेशीहरूमा चिनियाँ नागरिक सबैभन्दा धेरै छन्। त्यसपछि भियतनामी र दक्षिण कोरियालीहरू छन्। तर म्यान्मारका नागरिक १९.२ प्रतिशत र नेपालका नागरिक १७.२ प्रतिशत ले बढेका छन्। यी दुवै देशका नागरिक अहिले जापानका शीर्ष १० विदेशी समुदायहरूमा पर्छन्।

यता जुलाई १ सम्म जापानमा अवैध रूपमा बसोबास गर्ने विदेशीहरूको संख्या ७१ हजार २ सय २९ रहेको छ, जुन ६ महिनाअघि भन्दा ४.९ प्रतिशतले घटेको हो। अवैध बसोबासकर्तामध्ये भियतनामीहरू १३ हजार ७० जना, थाइल्यान्डका १० हजार ९ सय २४ जना र दक्षिण कोरियाली १० हजार २ सय ८६ जना रहेका छन्।

विश्लेषकहरूका अनुसार, यो तथ्यांकले जापानमा श्रमशक्ति अभावका कारण विदेशी कामदारप्रति बढ्दो निर्भरता झल्काउँछ, जसले देशको आर्थिक गतिविधिमा विदेशी समुदायको भूमिका अझ मजबुत बनाएको छ।