टोकियो,जापान। जापानमा आर्थिक रूपमा कमजोर गर्भवती महिला र नयाँ आमामध्ये आधाभन्दा बढीको कुनै पनि प्रकारको बचत नभएको पाइएको छ। “सेभ द चिल्ड्रेन जापान” नामक गैरनाफामूलक संस्थाले शुक्रबार सार्वजनिक गरेको सर्वेक्षणले यस्तो तथ्य उजागर गरेको हो।

यो सर्वेक्षण सन् २०२५ अप्रिलदेखि मे महिनासम्म बाल स्याहार सहयोगका लागि आवेदन दिने २५९ जनामाथि गरिएको थियो। सबैले मान्य जवाफ दिएका थिए। तीमध्ये झन्डै ७३ प्रतिशत अविवाहित वा एकल आमाहरू रहेका थिए। रोजगारी अवस्थाका हिसाबले ४५.६ प्रतिशत बेरोजगार र २८.६ प्रतिशत आंशिक समय (पार्ट–टाइम) काम गर्ने थिए।

सर्वेक्षण अनुसार, ५४.१ प्रतिशतले आफूसँग बचत शून्य रहेको बताएका थिए भने २२.४ प्रतिशतले एक लाख येन (लगभग ६५० डलर) भन्दा कम बचत रहेको बताएका थिए। ८६.९ प्रतिशतले गर्भावस्था र सुत्केरी अवधिमा कामका अवसर सीमित हुने भएकाले आर्थिक अस्थिरताबारे चिन्ता व्यक्त गरेका थिए। त्यस्तै ५२.९ प्रतिशतले सुत्केरीका लागि आवश्यक सामग्रीहरू (जस्तै बच्चाको कपडा, डायपर, दुध आदि) तयारी गर्न कठिन भएको बताएका थिए।

सुत्केरीपछि घर खर्च कसरी व्यवस्थापन गर्ने भन्ने प्रश्नमा ६१.८ प्रतिशतले “बालभत्ता र बाल–पालन भत्ता” जस्ता सरकारी सहायता प्रयोग गर्ने बताएका छन्। ५३.३ प्रतिशतले बच्चा जन्मिएलगत्तै काममा फर्किने बताएका छन् भने २२ प्रतिशतले आफ्नै थोरै बचत खर्च गर्ने बताएका छन्।

स्वतन्त्र प्रतिक्रियामा धेरैले आफ्नो पीडा व्यक्त गरेका थिए — “बच्चा जन्मिएपछि डायपर र दूध किन्ने खर्च पनि धान्न सक्ने कि नसक्ने चिन्ता छ” र “आफ्ना आमाबुबा सँग सम्बन्ध राम्रो नभएकाले भर पर्न सक्दिन” जस्ता अभिव्यक्तिहरू आएका थिए।

संस्थाका एक अधिकारीले भने — “यस्तो अवस्थामा तुरुन्तै प्रभाव पार्ने सहयोग आवश्यक छ, जस्तै नगद सहायता वा बाल स्याहार सामग्री वितरण।” उनले गर्भवती र नयाँ आमाहरूका लागि आर्थिक असुरक्षा र एक्लोपन कम गर्ने दीर्घकालीन सहयोग प्रणाली बनाउन केन्द्र र स्थानीय सरकारहरूलाई आग्रह गरे।