टोकियो/जापान। अक्टोबर १२ सम्मको एक सातामा जापानभरका अस्पतालहरूले पठाएको विवरणअनुसार इन्फ्लुएन्जा (फ्लू) संक्रमितहरूको संख्या अघिल्लो साताको तुलनामा झन्डै एक दशमलव पाँच गुणा बढेको पाइएको छ।

राष्ट्रिय स्वास्थ्य संकट व्यवस्थापन संस्थाका अनुसार देशभरका करिब ३,००० भन्दा बढी स्वास्थ्य संस्थाबाट एक हप्तामा जम्मा ९,०७४ जना संक्रमितको विवरण प्राप्त भएको हो, जुन अघिल्लो साताको तुलनामा करिब १.५ गुणा बढी हो। औसतमा एक स्वास्थ्य संस्थामा २.३६ जना संक्रमित पाइएको छ, जसमा अघिल्लो साताबाट ०.८ जनाको वृद्धि भएको देखिएको छ।

प्रिफेक्चरगत रूपमा हेर्दा, ओकिनावा प्रिफेक्चरमा १४.३८ जना, टोकियोमा ४.७६ जना, कानागावा ४.२१ जना, चिबा ४.२ जना, सैतामा ३.९२ जना, र मियाजाकीमा ३.२१ जना संक्रमित पाइएको छ।
कुल ३१ प्रिफेक्चरमा औसत संक्रमित संख्या “१” भन्दा माथि पुगेको छ भने, ४४ प्रिफेक्चरमा अघिल्लो साताको तुलनामा वृद्धि भएको देखिएको छ।

स्वास्थ्य, श्रम तथा कल्याण मन्त्रालयले नियमित हात धुने, सही रूपमा मास्क लगाउने र आधारभूत संक्रमण रोकथामका उपायहरू अपनाउने सल्लाह दिएको छ। साथै, संक्रमण फैलिन नदिनका लागि इन्फ्लुएन्जा खोप लगाउनेबारे पनि विचार गर्न आग्रह गरिएको छ।