टोकियो,जापान। जापानमा पछिल्ला वर्षहरूमा अत्यधिक मद्यपानबाट हुने स्वास्थ्य जोखिमबारे जनचेतना बढ्दै गए पनि महिलाहरूका लागि यो अझ खतरनाक सावित हुने एक अध्ययनले देखाएको छ। विशेषज्ञहरूका अनुसार महिलाहरूले पुरुषसरह मात्रामा मद्यपान गरेमा छिट्टै कलेजो सिरोसिसजस्ता गम्भीर रोगहरू विकसित हुन सक्छन्।

एनएलआई अनुसन्धान संस्थानकी वरिष्ठ अनुसन्धानकर्ता युको मुरामाचुले स्वास्थ्य, श्रम र कल्याण मन्त्रालयले सन् २०२३ मा गरेको “राष्ट्रिय स्वास्थ्य तथा पोषण सर्वेक्षण” का आधारमा तयार पारेको प्रतिवेदनअनुसार, उच्च जोखिम मानिने दैनिक ‘शुद्ध अल्कोहल’ मात्रा पुरुषका लागि ४० ग्राम र महिलाका लागि २० ग्रामभन्दा बढी हो।

उदाहरणका रूपमा, ५% अल्कोहल भएको ३५० मिलिलिटर बियरको एउटा क्यानमा १४ ग्राम शुद्ध अल्कोहल हुन्छ। त्यसअनुसार पुरुषका लागि करिब २.८ क्यान र महिलाका लागि १.४ क्यानभन्दा बढी सेवन गर्नु स्वास्थ्यका लागि खतरनाक मानिन्छ।

जापानका केही अल्कोहल उत्पादक कम्पनीहरूले हाल आफ्ना उत्पादनमा शुद्ध अल्कोहलको मात्रा स्पष्ट रूपमा उल्लेख गर्न थालेका छन्। सर्वेक्षणअनुसार उच्च जोखिम स्तरमा मद्यपान गर्ने जनसंख्या पुरुषमा १४.१% र महिलामा ९.५% रहेको छ। सन् २०१० पछि पुरुषमा यो दर स्थिर रहे पनि महिलामा भने क्रमशः बढ्दो प्रवृत्ति देखिएको छ।

उमेर समूहका हिसाबले हेर्दा, पुरुषमा ४० दशकका व्यक्तिहरूमा (२३.६%) यो दर सबैभन्दा बढी छ भने महिलामा ४० दशकमा १३.५% र ५० दशकमा १४.६% पुगेको छ।

मुरामाचुका अनुसार, परम्परागत रूपमा जापानी महिलामा मद्यपानको दर कम भएकाले यो समस्या प्रायः बेवास्ता गरिएको थियो। अहिले आएर मात्रै महिलाको मद्यपान सम्बन्धी सचेतना कार्यक्रमहरू सुरु भएका छन्, तर अझै पनि धेरै महिलाले आफू अत्यधिक पिउँदैछु भन्ने महसुस गर्न सकेका छैनन्।

स्वास्थ्य मन्त्रालयका अनुसार महिलाको शरीरमा पानीको मात्रा पुरुषभन्दा कम हुन्छ र तिनीहरूको शरीरले अल्कोहल पचाउने क्षमता पनि कम हुन्छ। साथै, महिला हर्मोनले पनि अल्कोहलको असरलाई बढी संवेदनशील बनाउँछ। केही महिलामा कम मात्राको मद्यपानले समेत छोटो समयमा कलेजो सिरोसिस विकास गरेको उदाहरणहरू पाइएका छन्। त्यसैले महिलाका लागि सुरक्षित दैनिक अल्कोहलको मात्रा पुरुषको तुलनामा आधा मात्र राखिएको हो।

हाल जापानमा कार्यरत महिलाहरूको संख्या बढ्दै जाँदा सामाजिक तथा व्यावसायिक परिवेशमा मद्यपानका अवसरहरू पनि बढेका छन्। कतिपय महिलाहरू पुरुषसरह पिउँदै जाने प्रवृत्तिमा छन्, जसले दीर्घकालीन स्वास्थ्य जोखिम निम्त्याउन सक्छ।