टोकियो,जापान। वर्षअन्त्य तथा नयाँ वर्षको लामो बिदा अवधिमा विदेश यात्रा गर्ने जापानीहरूको संख्या करिब १० लाख पुग्ने अनुमान गरिएको छ। ट्राभल कम्पनी जे–टिबीले गरेको सर्वेक्षणअनुसार यो संख्या अघिल्लो वर्षको तुलनामा ३१.५ प्रतिशतले वृद्धि भएको हो। यससँगै विदेश यात्रा गर्नेको संख्या कोभिड–१९ महामारीअघिको करिब ९० प्रतिशत स्तर मा फर्किने अपेक्षा गरिएको छ।

डिसेम्बर २७–२८ शनिबार–आइतबार परेकाले र त्यसपछि नयाँ वर्षका पहिलो ३ दिन बिदा जोडिँदा लामो बिदाको फाइदा उठाउँदै धेरैले लामो दूरीका गन्तव्य रोज्ने अनुमान छ। जे–टिबीका अनुसार हवाई र युरोप जस्ता गन्तव्यप्रति आकर्षण बढेको छ। सर्वेक्षणले शनिबारदेखि जनवरी ५ तारिखसम्मको बिदा अवधिलाई समेटेको छ।

विदेश तथा स्वदेशी यात्रा दुवैलाई समेट्दा कुल यात्रुको संख्या ३ करोड ९८ लाख ७० हजार पुग्ने अनुमान गरिएको छ, जुन अघिल्लो वर्षको तुलनामा २.५ प्रतिशतले बढी हो। यद्यपि, दक्षिण कोरिया र ताइवानजस्ता नजिकका विदेश गन्तव्य रोज्नेको अनुपात भने घटेको छ। यसको सट्टा ४ देखि ६ रात बसाइका यात्राहरू बढेका छन्।

एक यात्रुले औसतमा २ लाख ७५ हजार येन खर्च गर्ने अनुमान गरिएको छ, जुन सन् २००० यताकै सबैभन्दा उच्च स्तर हो। येन कमजोर नै रहे पनि “धेरै उपभोक्ता यस अवस्थासँग अभ्यस्त भइसकेका छन् र विदेश यात्रा गर्न इच्छुक उपभोक्ताको निश्चित समूह अझै सक्रिय छ,” जे–टिबीका एक अधिकारीले बताएका छन्।

जे–टिबीका लोकप्रिय प्याकेजहरूमा युरोपका सहरहरूमा हप–अन, हप–अफ बस टुर, हवाईका रिसोर्ट होटल, तथा ग्रान्ड इजिप्सियन म्युजियम पूर्ण रूपमा खुल्ला भएपछि इजिप्ट यात्राको बुकिङ पनि बढेको कम्पनीले जनाएको छ।

स्वदेशी यात्रातर्फ भने कारमार्फत पुग्न सकिने छोटो पारिवारिक यात्रा बढ्दो क्रममा छन्। १ रात २ दिन का यात्रा कुल यात्रामध्ये करिब ४० प्रतिशत रहेको छ।

यो सर्वेक्षण नोभेम्बर १३ तारिखसम्मका ३ दिन सञ्चालन गरिएको थियो, जसमा वर्षअन्त्य तथा नयाँ वर्ष बिदामा यात्रा गर्ने वा गर्ने सम्भावना रहेको बताएका २ हजार ६० जना सहभागी थिए।