टोकियो,जापान। जापानमा नयाँ वर्षको लामो बिदा सुरु भएसँगै घर फर्किने यात्रुहरूको भिड शनिबार चरममा पुगेको छ।आज आईतबार पनि बिहानैदेखि प्रमुख रेलस्टेसन र विमानस्थलहरूमा यात्रुको बाक्लो चाप देखिएको छ। सुटकेस र उपहार बोकेका परिवारहरू प्लेटफर्म र चेक–इन काउन्टरमा लाम लागिरहेका छन्। यस वर्षको बिदा अवधि अधिकतम ९ दिनसम्मको रहेको छ।

वर्षभरि बढ्दो महँगी र कामकाजी व्यस्ततापछि धेरैले नयाँ वर्षको अवसरमा परिवारसँग समय बिताउन घर फर्किने योजना बनाएका छन्। राजधानी क्षेत्रका मुख्य यातायात केन्द्रहरूमा यात्रु व्यवस्थापनका लागि अतिरिक्त कर्मचारी परिचालन गरिएको छ।

टोकियो स्टेशन र सिनओसाका स्टेशन मा शिन्कानसेन तथा सीमित एक्सप्रेस सेवामा यात्रुको चाप उच्च देखिएको छ। उता, हानेदा एयरपोर्ट मा पनि घरेलु उडानतर्फ जाने यात्रुहरूको आवागमन उल्लेख्य रूपमा बढेको छ।

सम्बन्धित निकायहरूले भीडभाडका कारण ढिलाइ हुन सक्ने भन्दै समयमै स्टेशन र विमानस्थल पुग्न तथा सुरक्षा निर्देशन पालना गर्न आग्रह गरेका छन्। नयाँ वर्ष नजिकिँदै जाँदा आगामी केही दिनसम्म घरफर्किने यात्रुको चाप उच्च रहने अनुमान गरिएको छ।