टोकियो,जापान । जापानको राष्ट्रिय प्रहरी एजेन्सी र अग्नि तथा विपद् व्यवस्थापन एजेन्सीले नयाँ वर्षको अवसरमा मोची (चामलबाट बनेको केक) खाँदा वृद्धवृद्धाले विशेष सावधानी अपनाउन आग्रह गरेका छन्।

यो चेतावनी हरेक वर्ष यसै समयमा दिइँदै आएको छ। चिप्लो र टाँसिने स्वभावका कारण मोची खाँदा वृद्धवृद्धामा घाँटी अड्किने दुर्घटना बारम्बार हुने गरेको छ।

स्वास्थ्य अधिकारीहरूले मोचीसँग सम्बन्धित दुर्घटनाबाट बच्नका लागि केही सावधानी अपनाउन सुझाव दिएका छन्। मोची खानुअघि चिया वा सुप पिएर घाँटी भिजाउने, मोचीलाई साना र सजिलै चपाउन मिल्ने टुक्रामा काट्ने, हतारमा ननिल्ने र राम्ररी चपाएर मात्र निल्ने सुझाव दिइएको छ।

नयाँ वर्षको समयमा परिवारहरू परम्परागत रूपमा ओजोनी सुप पकाउने गर्छन्, जसमा तरकारीको झोलसँगै मोची हालिन्छ। यस वर्ष जनवरीको पहिलो तीन दिनमै टोकियोमा मा मोची घाँटीमा अड्किएर ९ जनालाई अस्पताल लगिएको थियो। तीमध्ये दुई जनाको पछि मृत्यु भएको छ।

नयाँ वर्षका परम्परागत परिकारको आनन्द लिँदा विशेषगरी वृद्धवृद्धाको सुरक्षालाई ध्यानमा राख्न अधिकारीहरूले पुनः आग्रह गरेका छन्।